Një 14-vjeçare, Paloma Nicole Arellano, ka ndërruar jetë në mënyrë tragjike një javë pas një operacioni për zmadhimin e gjoksit në një spital në Durango, Meksikë. Sipas certifikatës së vdekjes, shkaku ishte edema cerebrale e shkaktuar nga një sëmundje respiratore. Megjithatë, babai i saj, Carlos Arellano, është i pikëlluar dhe dyshon se mjekët po fshehin të vërtetën.
Carlos deklaroi se kishte mësuar për operacionin estetik vetëm gjatë funeralit, kur vuri re shenjat dhe implantet në trupin e vajzës. Ai shprehu indinjatën e tij ndaj certifikatës së vdekjes, duke thënë se ajo përmendte një “sëmundje” për të fshehur faktin e operacionit. Babai i thyer nga dhimbja ka paralajmëruar një ankesë zyrtare dhe kërkon që të hetohen të gjithë të përfshirët në këtë tragjedi.
Autoritetet lokale kanë konfirmuar se kanë hapur një hetim për rrethanat e vdekjes së Paloma Nicole. Ngjarja ka shkaktuar tronditje të madhe në komunitet dhe ka rikthyer vëmendjen mbi rreziqet e ndërhyrjeve estetike, veçanërisht kur bëhet fjalë për të mitur.
Kjo tragjedi ndodh vetëm pak ditë pasi një grua 28-vjeçare në Brazil ndërroi jetë gjatë një nderhyrjeje për ngritje të vitheve, duke theksuar nevojën për siguri maksimale dhe mbikëqyrje të rreptë në operacionet estetike.
Ngjarja e Paloma Nicole Arellano është një kujtesë e hidhur për rreziqet që mund të shfaqen kur operacionet estetike kryhen pa transparencë dhe pa miratimin e plotë të familjes.
