Një aksident i tmerrshëm ka ndodhur mbrëmjen e djeshme në autostradën Shkup – Tetovë, ku një autobus humbi kontrollin duke rënë në humnerë.
Numri i viktimave ka shkuar në 14 dhe është konfirmuar edhe kryeministri i Maqedonisë së Veriut, Zoran Zaev, i cili tha se 7 prej viktimave ndërruan jetë në vendin e ngjarjes.
Qeveria në mbledhjen e jashtëzakonshme të mbrëmjes së djeshme shpalli 14 dhe 15 shkurtin ditë zie.
“Një natë e vështirë, nuk kam fjalë për të shprehur ngushëllimet për familjet e viktimave. Bashkë ndajmë dhimbjen, shteti po vuan. I mobilizuam të gjitha forcat, Qeveria solli vendim me të cili në 14 dhe 15 shkurti shpallen ditë zie”, deklaroi Zaev.
Mediat në Maqedoninë Veriore raportojnë se mes viktimave ishte edhe shtetasi Jovica Trpevski, i cili është djali i Blagojce Trpevskit, deputet nga radhët e partisë LSDM.
Nuk dihen edhe rrethanat e vërteta të aksidentit, ndërsa autoritetet po hetojnë për zbardhjen e ngjarjes tragjike.
