Jeta e saj, e kthyer në një dokumentar, është vlerësuar shumë lartë nga kritikët e filmit. Amy Winehouse lindi për të shkëlqyer me zërin e saj, por edhe për të vuajtur, duke lënduar veten.
“Amy” është një dokumentar biografik dedikuar jetës së këngëtares, lidhjet e saj problematike, mënyra si lëndonte veten dhe varësia e saj ndaj alkoolit, prej të cilit humbi jetën në mënyrë tragjike në vitin 2011.
“Amy” është një prodhim i vitit 2015, drejtuar nga regjisori britanik Asif Kapadia. Ai është realizuar si një shkrirje e videove të pashfaqura më parë të këngëtares bashkë me 100 intervista të të afërmve.
Dokumentari fillon me një video ku ajo shfaqet në moshën 14-vjeçare dhe vijon me video të tjera personale. Ndërmjet tyre, video që Winehouse regjistroi në taksi me mikun më të ngushtë apo videon që ajo regjistroi gjatë pushimeve të saj në Spanjë.
Regjistrime të tjera përfshijnë shumë performanca live të yllit të muzikës soul ku më famëkeqja është ajo e koncertit në Serbi, gjatë të cilit këngëtarja u shfaq e dehur një muaj para se të vdiste. Filmimi mbyllet me intervistën e shoqes më të ngushtë të këngëtares, e cila tregon telefonatën e fundit që pati me Amy-n dhe momentet kur autoritetet nxorën trupin e saj pasi u gjend e helmuar nga alkooli në apartament.
“Amy” është dokumentari britanik me më shumë fitime. Ai ka marrë 33 nominime prej të cilave edhe një nominim për çmimin “Oscar” si “Dokumentari më i mirë”.
