Një përballje plot emocione, përmbysje dhe tension deri në sekondat e fundit përfundoi me kualifikimin e Galatasaray, që kalon më tej pas dy ndeshjeve me rezultatin e përgjithshëm 7-5 ndaj Juventusit. Një duel që ofroi gjithçka: gola, karton të kuq dhe një fund dramatik.
Juventusi e nisi ndeshjen me intensitet dhe arriti të kalojë i pari në avantazh. Në minutën e 37-të, Manuel Locatelli u tregua i saktë nga pika e bardhë, duke shënuar për 1-0. Megjithatë, rrjedha e takimit ndryshoi rrënjësisht në fillimin e pjesës së dytë, kur Lloyd Kelly u ndëshkua me karton të kuq pas ndërhyrjes së VAR-it, duke lënë bardhezinjtë me një lojtar më pak për më shumë se 70 minuta lojë.
Pavarësisht inferioritetit numerik, Juventusi reagoi në mënyrë mbresëlënëse. Federico Gatti realizoi golin e dytë në minutën e 70-të, ndërsa në minutën e 82-të Weston McKennie shënoi me kokë për 3-0, duke barazuar rezultatin e përgjithshëm dhe duke e çuar sfidën në vazhdime.
Në kohën shtesë, Galatasaray tregoi më shumë qetësi. Në minutën e 106-të, Victor Osimhen shfrytëzoi një asist të Baris Alper Yilmaz dhe shënoi golin që ndryshoi gjithçka. Më pas, ishte vetë Yilmaz që gjeti rrjetën për 3-2, duke vulosur kualifikimin.
Juventusi luftoi deri në fund, por këtë herë heroizmi nuk mjaftoi. Galatasaray feston një kualifikim dramatik, ndërsa bardhezinjtë ndalen pas një ndeshjeje që do të kujtohet gjatë.
