Enca Haxhia njihet si mbretëresha e “Photoshop”-it, pavarësisht se arrin t’i zbulohen të gjitha ndërhyrjet në fotografitë që poston në rrjetet sociale.
Në fakt për 20-vjeçaren është aluduar se ka kryer edhe operacione plastike, të cilat i ka mohuar. Por këngëtarja e re çuditi kur pranoi më në fund ndërhyrjet në fotografitë e saj, të cilat janë faktuar shpesh nga mediat dhe fansat.
“Tek fotot profesionale sigurisht që editimi është i domosdoshëm për kualitet dhe kjo bëhet nga profesionistë e jo nga unë. Është e vërtetë që ndonjëherë kam ndërhyrë dhe vetë në fotot e mia, më së shumti për të rregulluar diçka që nuk shkon dhe më duket injorancë dhe hipokrizi të gjykohem për këtë, sepse kjo gjë bëhet nga të gjitha vajzat normale deri tek personazhet më të famshëm në botë, pavarësisht se jo të gjithë kanë mendjehapësinë ta pranojnë”, shprehet Enca.
Ajo u justifikua me faktin se është më shumë e përfshirë te karriera e saj, ndërkohë që fiziku i pëlqen siç e ka, pavarësisht se ushtrohet vazhdimisht. Ndërsa për fotot e realizuar nga të rinjtë në koncertet e saj, që vërtetojnë ndryshimin tërësor të paraqitjes së këngëtares, Enca u shpreh se e ka mendjen te performanca se sa te qëndrimi estetik.
“Në internet mund të gjesh lloj-lloj fotosh të miat, që nga momentet më të mira, deri tek ato më të këqijat prej koncerteve, ku unë jam e djersitur, pa mendje, apo në performancë e sipër ku do të theksoja se interpretimi im është ‘live’ dhe sigurisht që jo e gjithë vëmendja ime do të fokusohet tek qëndrimi estetik. Asnjëherë s’e kam thënë që kam trupin perfekt. Këtë hipotezë e kanë ngritur mediat dhe njerëzit, dhe janë po të njëjtët që e përqafojnë apo rrëzojnë”, tha 20-vjeçarja.
Në këtë mënyrë ajo bëri të qartë se nuk do të ndali së postuari foto të pavërteta dhe me ndërhyrje, duke i kushtuar kështu më shumë rëndësi mendimit të publikut. Nga ana tjetër këto ndërhyrje tregojnë se këngëtarja kompleksohet nga trupi i saj, pavarësisht se shpreh të kundërtën.
