Shqipëria është vendi me të ardhurat më të ulëta për frymë në Europë ku familje të shumta mezi sigurojnë edhe bukën e gojës.
I tillë është edhe fati familjes së Bujar Lloçit në zonën e Shpatit në Baldushk.
Tërmeti i 26 nëntorit ishte goditja e fundit për familjen Lloçi që prej vitesh jeton në varfëri ekstreme e që tashmë, nuk ka as një strehë mbi kokë.
Shtëpia e tyre është shpallur e pabanueshme dhe tashmë, Bujari së bashku me bashkëshorten, nënën dhe tre fëmijët jetojnë prej tre javësh në një çadër të ngritur në oborrin e shtëpisë.
Pak pasi mbërritëm në shtëpinë e tyre, pas një rruge të gjatë e në terren tejet të vështirë, në oborr vijnë dhe dy nga fëmijët e familjes, Brunilda 10 vjeçe dhe Vangjeli 14 vjeç të cilët na thonë se vëllanë e madh, Sabjanin, e kishin lënë në pyll për të mbledhur drru për t’u ngrohur.
Teksa na tregojnë kushtet brenda në çadër, nuk mund të na shpëtonte nga sytë një pirg me libra e fletore në ato kushte aq të vështira.
Bujari na tregon se vajza ndjek shkollën 9-vjeçare “Fushas”, ndërsa Vangjeli dhe Sabjani 18 vjeç shkojnë në shkollën e mesme “Feti Vogli” në Baldushk.
“Shkolla është një orë e gjysmë larg në këmbë nga shtëpia.”-shprehet Bujari duke shtuar se ndonëse fëmijët një pjesë të rrugës përpiqen ta bëjnë me autobus, u duhet të paguajnë të plotë biletën prej 40 lekësh.
Por një VKM e miratuar në 2015-ën parashikon që për nxënësit që ndjekin shkollat jashtë vendbanimit të tyre, shpenzimet e transportit mbulohen nga buxheti i shtetit.
Mirëpo operatorët e shërbimit të transportit publik nuk e kanë marrë parasysh një gjë të tillë dhe faturinot shpesh i zbresin fëmijët nga autobusi, në rastet kur nuk kanë mundësi që ta paguajnë. Kjo pasi të ardhurat e vetme të familjes Lloçi janë pensioni 100 mijë lekë që merr nëna e Bujarit dhe asistenca prej 54 mijë lekësh.
E njëjta situatë paraqitet edhe për tre fëmijët e familjes Ahmetaj. Ilirjani 18 vjeç, Elona 16 vjeçe dhe Murati 6 vjeç, në të shumtën e rasteve detyrohen ta bëjnë rrugën nga shtëpia në shkollë në këmbë, që përveçse e gjatë, është dhe tepër e vështirë për shkak të terrenit.
Teksa familjet në Baldushk janë ende në pritje një zgjidhjeje përsa i përket strehimit pas shkatërrimit të shtëpive nga tërmeti i 26 nëntorit, ne jemi në pritje të një zgjidhjeje edhe për transportin e fëmijëve në shkolla.
