Muzika dhe e gjithë bota humbi një legjendë më 21 prill të vitit të kaluar!
Ditët e fundit të jetës së Prince
Prince po trajtohej për overdozë vetëm gjashtë ditë para se të gjendej i vdekur në pronën e tij në Minnesota .
Lajmet lidhur me overdozën erdhën pas fotografive ku legjenda e muzikës shfaqej duke ecur jashtë një farmacie, vetëm 15 orë para se ai të shpallej i vdekur.
Avioni privat i të ndjerit bëri një ulje emergjente në Moline, Illinois, atë premten , pasi ai performoi në Atlanta, që të mund të nxitonte për në spital.
Edhe pse përfaqësuesi i tij tha se ai po kurohej për grip, disa burime thanë për “TMZ” se doktorët i dhanë atij një “dozë shpëtimi”, që përgjithësisht jepet kur viktima është në rrethana të tmerrshme pas një overdoze droge.
Sipas burimeve, doktorët i këshilluan Prince që të qëndronte në spital për 24 orë, por kur nuk iu dha një dhomë private, ai vendosi të largohej. Kur u largua nga spitali, Prince nuk ishte aspak mirë. Ai u lirua pas tre orësh dhe bëri një paraqitje në një festë në Minnesota të nesërmen, duke u thënë fansave “prisni disa ditë që mos të harxhoni lutjet”.
Ikona e muzikës 57 vjeç u pa më pas në 19.00 të mërkurën në një farmaci, i dobët fizikisht dhe nervoz, me një grup punonjësish ose miqsh. Ishte vizita e tij e katër në farmaci gjatë kësaj jave. Nuk dihet pse ai vendosi që të shkonte vet në farmaci dhe të mos dërgonte dikë tjetër.
Prince u gjet pa ndjenja në ashensor në pronën e tij në Paisley Park në orën 9.43 (sipas orës lokale) të enjten dhe u shpall i vdekur më pak se 30 minuta më vonë.
Testet e toksikologjisë të ndërmarra për vdekjen e Prince zbuluan se artisti ndërroi jetë si pasojë e një overdoze aksidentale nga “opioid fentanyl”.
Ky i fundit, fentanyl, që jepet nga mjekët për trajtimin e kancerit, është përgjegjës për një rritje të vdekjeve nga overdozat në Shtete e Bashkuara, duke qenë se prodhohet masivisht edhe në mënyra ilegale. Ky mjekim është 25 deri në 50 herë më i fuqishëm se heroina dhe 50 deri në 100 herë më i fuqishëm se morfina.
Kush ishte Prince/ Histori frymëzimi, nga fëmija i varfër në ikonë muzike
“Në vitet ’80 kur këngëtarë si Michael Jackson apo Bruce Springsteen publikonin albume çdo 3 vjet, Prince ruajti një profil enigmatik deri në nivele jo njerëzore” shkruan Rolling Stone. Më shumë se një njeri, Prince ishte një “Simbol i të pazakontës”.
Ndryshoi emrin 4 herë, u bë dëshmitar i Jehovait, qëndronte ditë me radhë zgjuar në studio e shumë të tjera. Asnjë këngëtar tjetër i rrymës pop nuk ishte një konstelacion talentesh, ashtu siç ishte Prince. Ai jo vetëm këndonte dhe kërcente, por bënte dhe kompozimin, produksionin dhe luante në shumë instrumente!
Të gjitha këto e dallonin atë si një artist me një dëshirë të çuditshme për të mbrojtur produktin e tij artistik. Prandaj 21 prilli nuk do jetë më njësoj për ata që duan rebelen, shpirtin e kundërshtimit, të çuditshmen dhe çmendurinë brenda tyre.
Dikur fëmija, që qëndronte jashtë fast-food-eve për të ndjerë aromën e ushqimeve që s’kishte para të blinte, u shndërrua në zotëruesin e 10 albumeve platin dhe një nga 10 këngëtarët solo më të pasur në botë me 100 milionë disqe të shitura nga 39 albumet e tij.
Prince Rogers Nelson lindi në 7 qershor të vitit 1958 në Minnesota. Në një intervistë ai ka thënë se në fakt ka lindur epileptik, por arriti të shërohej.
“Një engjëll më doli në ëndërr dhe më tha se do më shëronte” ka thënë këngëtari. Ka patur vetëm një fëmijë, Boy Gregory, i cili vdiq si pasojë e një deformimi në kafkë. U martua dhe divorcua dy herë, përkatësisht me Manuela Testolini Nelson (2001-2007); Mayte Garcia (1996-2000). Ylli i muzikës pop ka qenë gjithmonë në vëmendjen e mediave për lidhjet e tij me femra të tjera të ekranit, midis të cilave Kim Basinger, Karmen Elektra etj.
Në vitin 1993, Prince bëri një nga gjërat më të çuditshme. Shkëputi marrëdhënien me kompaninë “Warner Bros” dhe ndryshoi emrin në një simbol të pakuptueshëm nga askush. Kështu që në atë kohë të gjithë e thërrisnin “Këngëtari që e ka patur emrin Prince”. Kur Prince iu bashkua “Dëshmitarëve të Jehovait” në vitin 2001, vendosi të mos mallkonte apo ofendonte në tekstet e tij.
Nisi t’i binte pianos kur ishte 7 vjeç, kitarës në moshën 13-vjeçare dhe baterisë në moshën 14- vjeçare. Të gjitha këto i mësoi vetë! Albumet e tij të para,” For you” (1978) dhe “Prince” (1979) gjithashtu dhanë dhe shenjat e para që nuk kishim të bënim me një talent çfarëdo. Dhe kjo gjë u vërtetua në vitin 1980, kur ai nxorri albumin “Dirty Mind” (“Mendje e ndyrë”), që trajtonte seksin oral, incestin etj. Albumi i vitit 1982, “1999”, i dha atij mundësinë të bëhej një nga këngëtarët e parë me ngjyrë që transmetohej në MTV.
Por, albumi që i vendosi kurorën e një superylli ishte albumi “Purple Rain” i vitit 1984. Në këtë vit ai luante me bandën “The Revolution” kur fitoi dhe çmimin “Oscar” për këngën më të mirë në filmin “Purple Rain”.
Prince është autori i shumë hiteve, midis të cilave “Let’s go crazy”, “When Doves cry” dhe “Kiss”. Viti 2014 shënoi kulmin e karrierës pasi emri i tij u radhit midis emrave të shumtë në “Rock and Roll Hall of Fame”. “Prince rishkruajti rregulloren” u tha në atë kohë për këngëtarin. Më 9 maj 2015 Prince publikoi këngën e tij të fundit, “Baltimore”.
Stili unik i Prince
“Ka vetëm një mashkull në botën e muzikës që mund të dominojë këto lloj veshjesh” shkruan” BBC “. Që nga pantallonat me bel të lartë deri tek epoka e “Purple rain” me bluzat e famshme golf dhe me pupla, syzet me tre xhama, çizmet e larta, ngjyrat metalike apo dhe neon që të verbojnë sytë ku dallon ngjyra violë (e preferuara e këngëtarit), prerjet e shkurtra, kaçurrelat perfekte dhe gjithçka tjetër të çuditshme Vetëm Prince mundi të mbante për 4 dekada rresht kurorën e mbretit të këtij stili.
Në një intervistë Prince ka thënë se të gjitha këto i ka bërë që i vogël. “Moshatarët më ngacmonin sepse isha epileptik, kështu që unë mundohesha ta largoja vëmendjen duke u veshur në këtë mënyrë”. Së bashku me David Bowie, Adam Ant, Nick Rhodes, Robert Smith e shumë të tjerë: Prince solli dhe mbajti në modë make up-in (penelin e syve) tek meshkujt. Ky është gjeniu, mbreti i pakundërshtueshëm i viteve ‘80, ai që kombionte rock-un, muzikën funk, jazz, RnB.
Burimi: Daily Mail
