Pavarësisht se nuk mori asnjë çmim, filmi me metrazh të shkurtër shqiptar “Shok” na solli një fitore të gjithëve. Nominimi i këtij çmimi për “Oscar” bëri histori për botën artistike të filmit shqiptare. Kjo pasi ishte hera e parë që një prodhim shqiptaro-kosovar shfaqej në “Oscar”, përkrah aktorëve, regjisorëve, filmave dhe realizimeve më të rëndësishme në botën e kinematografisë.
Aktorët protagonistë të filmit na bënë krenarë, pasi dëgjuam për herë të parë të flitej shqip në ceremoninë më të rëndësishme të botës së filmit.
Eshrefi, Lumi dhe Andi e ngritën imazhin tonë në piedestalin e artit kinematografik, ndërsa çoi për herë të parë shqiponjën kuqezi në tapetin e “Oscar”-it.
Një moment i rëndësishëm ishte prezantimi para kamerës dhe gazetarit, që i cilësoi si freskia e tapetit të kuq. “Jeni padyshim freskia e tapetit të kuq”, u shpreh gazetari, ndërsa përfaqësuesit e filmit u shfaqën në një mënyrë shumë unike.
Kur ata janë pyetur nëse u mungon shtëpia, artisti i vogël Lumi na ka bërë të gjithë të qeshim kur tha: “Kujt i mungon shtëpia, kur ndodhesh këtu! Gjëja më e vështirë ishte komunikimi me regjisorin duke qenë se kjo është eksperienca jonë e parë dhe ne nuk e kemi njohur atë periudhë të vështirë lufte”.
Gjatë intervistës u shpreh edhe producenti Eshref Durmishi: “Ishte një punë gjigande, të cilën gjithsesi arritëm ta realizonim shumë shpejt. Kemi patur mbështetjen e të gjithë shqiptarëve kudo që janë. Nëse ne fitojmë ndoshta për ta do jemi heronj. Kjo do ishte gjëja më e mirë që mund t’i ndodhte shqiptarëve. Rrugë ose shkolla mund të marrin emrin tonë”.
Ishte filmi “Stutterer” (“Belbëzuesi”), ai që mori trofeun në kategorinë e filmave të shkurtër.
