Ministria e Mbrojtjes ka bërë publike një përditësim të situatës me zjarret që kanë përfshirë disa zona të Shqipërisë gjatë 24 orëve të fundit. Janë raportuar 19 vatra zjarri në total, ndërsa 6 prej tyre vijojnë të jenë aktive.
Vatrat e zjarrit janë përhapur në bashkitë e Finiqit, Vlorës, Elbasanit, Poliçanit, Beratit, Hasit, Bulqizës, Malësisë së Madhe, Lezhës, Kolonjës, Korçës, Tiranës, Kavajës dhe Fierit.
Aktualisht mbeten problematike këto zona:
•Elbasan – Zjarri në vendgrumbullimin e mbetjeve vijon të përhapet, pavarësisht izolimit të një dite më parë.
•Finiq – Zjarri midis fshatrave Grazhdan dhe Malçan ka avancuar në Leshnicë të Poshtme, por për momentin nuk kërcënon banesat.
•Vlorë – Në zonën “Sotiran” mes fshatrave Tragjas dhe Dukat janë aktive tre vatra, por pa rrezik për komunitetin.
•Poliçan – Në fshatin Zgërbonjë, forcat në terren po punojnë për shuarjen e një vatre që ka përfshirë rreth 50 ha.
•Bulqizë – Zjarri në Zerqan është shtrirë drejt “Malit të Bardhë”, duke aktivizuar më shumë trupa në terren.
•Malësi e Madhe – Vatra në “Bjeshkët e Parrusë” është riaktivizuar, ndërsa përpjekjet për izolimin e saj vazhdojnë.
Si pasojë e flakëve janë djegur rreth 65 hektarë bimësi, kryesisht me pemë, shkurre dhe barishte. Në operacionet e shuarjes janë angazhuar 362 forca operacionale, 37 mjete zjarrfikëse dhe 8 mjete të rënda, ndërsa Forcat e Armatosura kanë kontribuar me 104 efektivë, 6 mjete zjarrfikëse dhe mjete ndihmëse të tjera.
Sipas Institutit të Gjeoshkencave, niveli i rrezikut nga zjarret mbetet “i lartë” në shumicën e qarqeve. Në Durrës, rreziku është “i moderuar”, përveç disa zonave në jug të qarkut.
