Një ditë pas zgjedhjeve parlamentare të 11 majit 2025, kutitë e votimit po hapen njëra pas tjetrës në të gjithë vendin. Deri në orët e paradites së sotme, janë numëruar 1.819 nga gjithsej 5.225 qendra votimi, ndërsa rezultati paraprak po formëson një panoramë të qartë të garës elektorale.
Partia Socialiste vijon të kryesojë bindshëm me 243.734 vota, që përbëjnë 52.52% të totalit të deritanishëm. Pas saj renditet Partia Demokratike me 159.679 vota, ose 34.41%, ndërsa pjesa tjetër e votave shpërndahet mes subjekteve më të vogla që kanë hyrë në garë.
Ndër to, më e votuara është Partia Socialdemokrate (PSD) me 18.496 vota, ndjekur nga koalicioni “Nisma Shqipëria Bëhet” me 15.863 vota dhe Partia “Mundësia” me 12.031 vota.
Në listën e partive që kanë marrë një pjesë më të vogël të elektoratit janë:
•Lëvizja “Bashkë”: 5.769 vota
•Koalicioni Euroatlantik: 5.150 vota
•Koalicioni “Djathtas për Zhvillim”: 1.603 vota
•Aleanca Kombëtare Shqiptare (AKSH): 856 vota
•Lëvizja “Atdheu”: 597 vota
•Aleanca “Demokracia e Re”: 321 vota
Procesi i numërimit pritet të vijojë me ritme të shpejta gjatë gjithë ditës në të gjitha qarqet, ndërsa partitë dhe qytetarët ndjekin nga afër zhvillimet që do të përcaktojnë përbërjen e re të Kuvendit të Shqipërisë.
