Arkeologët kanë zbuluar në parkun e Amantias një varr antik, që nga vlerësimi paraprak thuhet se i përket shek. III-II para lindjes së Krishtit. Nga gërmimet janë zbuluar dhe dokumentuar një inventar i pasur objektesh arkeologjike, kryesisht enë qeramike. Kreu i Drejtorisë Rajonale të Trashëgimisë Kulturore në Vlorë, Orges Feimi, shprehet se janë evidentuar 4-5 pika të tjera brenda parkut të Amantias, në të cilat do të nisin gërmimet së shpejti.
“Këto zbulime konfirmojnë një datim të parkut arkeologjik të Amantias. Do të veçoja dhe zbulimin në gërmimin e shpëtimit që u krye në varrin tjetër, pjesë e akropolit i cili ndodhej mbi portën me hark të qytetit ilir të Amantias ku nga vlerësimet paraprake ne mendojmë se ky varr i përket periudhës otomane pasi përveç enëve qeramike të gjetura, u gjendën edhe disa monedha të ndryshme brenda varreve antike. Ne kemi evidentuar 4 apo 5 pika të tjera brenda këtij parku, të cilat ne presim të nisim gërmimet që t’i shtohen edhe disa monumente të tjera pjesë e këtij parku”, thotë Feimi.
Nga gërmimet e këtij viti, përveç monumenteve të reja, janë rikuperuar objekte të një rëndësie të veçantë që do të pasurojnë stendat e muzeve lokal dhe kombëtar.
