Gert Ferra dhe Igli Veizi do të jenë dy banorët më të rinj të Big Brother VIP 4, një lajm ekskluziv i zbuluar në studion e Fan Club.
Gerti, i cili ka pasur një histori konflikti me Laert Vasilin, theksoi se tashmë janë miq dhe kjo i përket së shkuarës.
Ndërkohë, Igli Veizi theksoi se do të hyjë në shtëpi pa asnjë plan, duke preferuar të jetë vetjak dhe të përjetojë eksperiencën në mënyrë të natyrshme, ndërsa Gerti shprehu dëshirën për të hyrë i vetmuar, pasi i pëlqen të jetë vetëm.
Rikujtojmë sherrin mes Gertit dhe Laertit:
Një incident i tensionuar ka ndodhur në 2015 në një lokal, ku Laert Vasili dhe Gert Ferra janë përfshirë në një konflikt të madh. Sipas dëshmitarëve, shkak për sherrin ka qenë një femër, e cila ishte shoqëruesja e Laertit dhe, siç thuhet, edhe e dashura e tij. Laert, i cili kishte tepruar me alkoolin, ka nisur të fyente vajzën në publik, çka ka shqetësuar Gertin, i cili ka ndërhyrë për ta mbrojtur. Pas një kërkese të Gertit për të ulur zërin, Laert ka reaguar keq, duke e fyër atë dhe duke filluar një përleshje fizike që ka shkaktuar kaos në lokal, duke rrëzuar tavolina dhe shishe.
Në përpjekje për të qetësuar situatën, disa punonjës policie dhe pronari i lokalit kanë ndërhyrë. Sipas burimeve, ky nuk ka qenë incidenti i parë i tillë për Laertin, i njohur për problemet me alkoolin, ndërsa një ngjarje e ngjashme ka ndodhur më herët kur gazetari Arjan Çani e ka ndaluar atë në intervistë për shkak të dehjes. Dy protagonistët kanë refuzuar të komentojnë ngjarjen kur janë kontaktuar.
