Ambasadorja e SHBA Yuri Kim u ka bërë apel autoriteteve të veprojnë sipas rekomandimeve të OSBE/ODIHR në lidhje me zgjedhjet e 25 prillit.
Duke shpërndarë në Twitter statusin e kreut të KQZ Ilirjan Celibashi rekomandimin e katërt të OSBE/ODIHR, Kim shkruan se është e drejta e qytetarëve për të votuar lirshëm, pa frikë ose presion ose joshje të paligjshme.
“Ne i nxisim autoritetet të veprojnë sipas këtij dhe rekomandimeve të tjera të @osce_odihr në lidhje me zgjedhjet e 25 prillit. E drejta e qytetarëve për të votuar lirshëm – pa frikë ose presion ose joshje të paligjshme – është themelore për demokracinë”- shkruan ambasadorja Yuri Kim në Twitter.
Po ashtu, Nënkryetari i Partisë Demokratike, Enkelejd Alibeaj kërkoi ngritjen e Komisionit Parlamentar përsa i përket zgjedhjeve të 25 prillit. Ai u shpreh se Partia Demokratike e ka detyrë jo vetëm ndaj zgjedhësve të saj, por edhe ndaj të gjithë qytetarëve që të hetojë masakrën zgjedhore të ndodhur më 25 prill.
Alibeaj ka treguar edhe nëntë pikat që sipas tij kanë nevojë urgjente që të hetohen, ndër të cilat është ajo e çështjes së spiunazhit modern.
“Së bashku me kolegët kemi dorëzuar kërkesën për ngritjen e një komisioni hetimor për masakrën zgjedhore që ndodhi në 25 Prill. Është një nevojë ulëritëse që sistemi demokratik kërkon, disa nga çështjet kryesore që meritojnë dhe do të hetohen, në transparencë të plotë me publikun:
- Mbyllja e kufijve, duke iu bërë të pamundur emigrantëve votimin
- Legalizimi i 10 mijë banesave
- Shtesa e ndihmës ekonomike vetëm disa muaj para zgjedhjeve, 20 mijë familje u rifutën në skemë, për tiu blerë votat përmes varfërisë
- Punësimi i më së paku 13 mijë shqiptarëve me kontrata të përkohshme, në këtë vend që vetëm ikin njerëzit për shkak të papunësisë.
- Rritja e rrogave për administratën, e cila është kthyer në një skuadër të PS, këta njerëz përdoren vetëm në periudhën e fushatave zgjedhore
- Do të hetohen 120 milionë të asfaltit elektoral
- Do të hetohen 505 milionë tendera, koncensione, që 878 kontrata, në vitet e tjera ka qenë një shifër tre herë më e vogël. Periudha pas pandemisë, ku lëngonte familja shqiptare, por u gjetën paratë për tiua shpërndarë një grupi të madh njerëzish të përzgjedhurish, të cilët punuan në fushatë për qeverinë.
- Fondet publike për tërmetin, fatkeqët dy dimra i kaluan jashtë, dhe u bënë me shtëpi vetëm disa javë para zgjedhjeve.
- Do të hetohet dhe ajo që është qershia mbi tortë, do të hetohet spiunazhi modern. Në 2021 në këtë vend edhe njëherë rikthehen makthet e regjimit të para 90-tës.”, ka thënë Alibeaj.
Por do të hetohen dhe të dënohen organizatorët e gjithë këtij skandali? Apo edhe kjo çështje e dhunimit nga përpilimi i profileve të secilit prej votuesve duke përdorur të dhëna mbi prejardhjen, punësimin e votuesit apo familjarëve të tij, nëse ka marrë pjesë apo jo në votimet e shkuara dhe se si është deklaruar në të shkuarën do të mbetet në heshtje?
Ekzistenca e databazës dhunon standardet në shumë dimensione. Parimi i fshehtësisë së votës, i cili duhet të garantojë vetë ekzistencën e zgjedhjes me ndërgjegje si dhe parimi i ndarjes së shtetit nga partia është cënuar rëndë nga fakti që të dhënat në databazë dukshëm janë rrëmbyer nga institucione të tjera.
Parimi i barazisë në garë elektorale është dhunuar nga keqpërdorimi i burimeve publike nga ana e partisë në pushtet
