Detaje të reja janë zbuluar lidhur me dëshminë e Filip Shehut, 41-vjeçarit të akuzuar për vrasjen e kolegut të tij, Indrit Ismaillari, ngjarje që tronditi Tiranën disa ditë më parë. Në rrëfimin e dhënë për hetuesit, Shehu ka pohuar se veprimi i tij nuk ishte i planifikuar, por pasojë e një konflikti të çastit në vendin e punës.
“Kishim debate të vazhdueshme. Më provokonte dhe ndihesha i kërcënuar,” është shprehur ai gjatë marrjes në pyetje. Megjithatë, ky version bie ndesh me dëshmitë e stafit të lokalit, të cilët kanë deklaruar se viktima ishte një punonjës i qetë dhe i respektuar, që prej pesë vitesh punonte në të njëjtin ambient. Ndërkohë, Shehu kishte vetëm pak muaj që ishte punësuar si shef kuzhine.
Sipas burimeve nga grupi hetimor, konflikti fatal nisi për një pjatë proshutë, të cilën viktima i kërkoi autorit të mos e përdorte pa leje. Pas një shkëmbimi fjalësh, 41-vjeçari ka marrë një thikë kuzhine dhe e ka goditur Ismaillarin në qafë, duke i shkaktuar plagë fatale.
Autori qëndroi në vendngjarje deri në mbërritjen e policisë, pa tentuar arratisjen. Hetimet po përqendrohen edhe në gjendjen psikologjike të Shehut, pasi mësohet se ai jetonte i vetëm dhe kishte pasur probleme familjare e sociale. Një ekspertizë mjeko-ligjore pritet të përcaktojë nëse autori kishte aftësi të plota mendore në momentin e kryerjes së krimit.
