Ervis Martinaj, një prej personave të përfshirë në vrasjen e 4 tetorit në një lokal të ish-Bllokut, do të vazhdojë të qëndrojë në burg. 38-vjeçari u njoftua me masën e sigurisë “arrest me burg” për 30 ditë, në seancën e sotme të zhvilluar në Gjykatën e Apelit.
Trupi gjykues, pasi shqyrtoi dinamikën e ngjarjes, nuk pranoi kërkesën për liri të bërë nga Martinaj. Pas vendimit, avokati i tij deklaroi se nuk ka prova që e implikojnë Martinajn në vrasjen që ndodhi në ish-Bllok.
Ai shtoi se klienti i tij nuk është i përfshirë në këtë vrasje dhe pretendimet e policisë se Redi Poposku ka fshehur armën e Martinajt, i quajti aludime të pavërtetuara.
Nga masakra që ndodhi në fillim të këtij muaji mbeti i vrarë Fabian Gaxha, ndërsa Martinaj së bashku me Elion Haton mbetën të plagosur. Të përfshirë në këtë ngjarje janë edhe i dashuri i Elvana Gjatës, Ervin Mata, komando Mervjol Bilo dhe Fabjol Alushi. Këngëtarja është cilësuar si “mollë sherri”, ndërsa ndodhet në kërkim nga policia pasi nuk ka dhënë dëshminë e saj para uniformave blu.
Burimi: BalkanWeb
