Një ngjarje e rëndë ka tronditur vendin mesditën e sotme. Një 19-vjeçar i identifikuar me emrin Grei Bihuci ka gjetur vdekjen pak minuta pasi është përleshur me disa bashkëmoshatarë, njëri prej të cilëve e ka qëlluar me thikë.
19-vjeçari ishte student në shkollën profesionale “Petro Sota” dhe paraditen e shfrytëzonte për të studiuar, ndërsa pasdite punonte kamarier në një pastiçeri. Sot pas dy orësh mësim, ai është ulur me miqtë e tij në një kafene që ndodhej pranë shkollës.
Pas disa minutash një grup adoleshentësh i afrohen dhe i kërkojnë sqarim për një konflikt të ndodhur në rrjete sociale. Këtu ka nisur edhe përleshja fizike mes të rinjve, ku njëri prej tyre, Florjan Muka 18 vjeç ka nxjerrë thikën dhe ka qëlluar Grei Bihucin.
19-vjeçari i plagosur ka tentuar të largohet, po për disa metra është shtrirë në tokë. I riu është transportuar me urgjencë në spital por për shkak të plagëve të marra nuk ka mundur të mbijetojë.
I plagosur ka mbetur edhe një 20-vjeçar, mik i viktimës, i cili ndërhyri për ta mbrojtur gjatë përleshjes, por ndodhet jashtë rrezikut për jetën. Autori, 18-vjeçari Florjan Muka është arrestuar nga policia dhe pritet të përballet me akuzën për veprën e rëndë penale.
