Klodian Rasha, para vrasjes ka qenë duke pirë kafe në një lokal në Laprakë. Ky fakt ka nxjerrë në dritë skandalin që policia lejonte lokale hapur në kohën orës policore kundrejt ryshfeteve.
Karantina ka zhvilluar biznesin e inspektorëve të policisë sipas zonave, të cilët marrin ryshfete ndaj lokaleve të seleksionuara për t’i lejuar të punojnë pas orës 22.00.
Hetimet e kryera nga Shërbimi për Çështjet e Brendshme dhe Ankesat (SHÇBA) nuk e kanë përfshirë këtë fakt. A ka hetuar SHÇBA, nëse kjo patrullë ka qenë tek ky lokal? SHÇBA duhet të hetojë dhe të thotë se kush është polici që merrte “pagën” mujore për sy qorr e vesh shurdh për këtë lokal hapur.
Lokali i përmendur nga dëshmitarët është në rrugën kryesore dhe qëndronte hapur kur të tjerët mbylleshin sipas rregullit të vënë nga qeveria.
Pse dalin pa kamera këta policë?
Nëse policët do të kishin kamerat në trup, vrasja e Klodian Rashës nuk do të kishte ndodhur. Këta policë, nuk kanë kamera ose i fikin, sepse mbarojnë turnin me xhepa të mbushur me ryshfete. SHÇBA e mbulon këtë fenomen, përndryshe do ta kishte përfshirë tek deklarata paraprake mbi hetimet e bëra për vrasjen e Klodian Rashës.
Policët me dy bordero
Kjo polici është kthyer me dy bordero, një e shtetit, tjetra tek biznesi i vogël që detyrohet të paguajë për të punuar. Institucioni i SHÇBA nuk duhet ta mbulonte, por ta hetonte deri në fund, të vinte në pranga policët përgjegjës.
Kështu si kjo kafene ka dhe të tjera. SHÇBA duhet ta kishte verifikuar rastin, sepse biznesi i vogël po mbijeton duke paguar policin për pak orë pune më shumë.
Këto lokale mund të jenë oaze të shefit të komisariatit, të cilat i ruante patrulla që vrau Klodian Rashën. Nuk ka mundësi që patrulla e motorizuar nuk e kishte parë hapur këtë lokal në rrugën kryesore. Ndërkohë që lejonin të punonte hapur lokali, ruanin tek cepi ndonjë të mjerë si Klodian Rasha që kalonte aty.
Drejtori i SHÇBA u mbyll gojën ankesave
Edhe kur ka ankesa nga qytetarët, për biznese që thyejnë ligjin, si për shembull për zhurmat, SHÇBA i zvarrit hetimet. Ky shërbim lejon që këta policë të vazhdojnë biznesin e vjeljes së parave nga thyerësit e ligjit. Drejtori i SHÇBA, Muhamet Rrumbullaku, me firmën e tij ka mbyllur hetimin e një rasti ndaj një patrulle të Stacionit të Policisë Golem, që u denoncua për mosveprimin e saj. Rrumbullaku e ka dërguar thjesht për “masë disiplinore”.
Bëhet fjalë për një ankesë të bërë më 25 gusht 2020, ku qytetarët u ankuan për prishjen e qetësisë publike nga Resort “Prestige”, mbas orës 20.00, me muzikën e lartë.
Policia shkoi në vendngjarje dhe u largua pa marrë asnjë masë ndaj këtij biznesi, që vazhdonte të thyente ligjin.
Megjithëse ankesa u verifikua nga SHÇBA përmes kamerave të sigurisë dhe dëshmive të policëve, hetimi nuk shkoi më tej.
Pas shumë ankesave të përsëritura, hetimi disamujor për një shkelje kaq të hapur, u mbyll me propozimin që policët të marrin masë disiplinore.
Pra, policët që favorizojnë shkeljen e ligjit përmes shpërdorimit të detyrës, nuk hetohen për korrupsion, por u jepen masa disiplinore dhe vazhdojnë punën. Ky është dokumenti me firmën e Muhamet Rrumbullakut që vërteton se si SHÇBA ua ka mbyllur gojën qytetarëve dhe këta policë vazhdojnë në detyrat që kanë pasur.
Rasti i Laprakës duhet t’i shërbejë qeverisë që ta reformojë dhe spastrojë SHÇBA-në, e cila siç del dhe më sipër, është bërë mbulesë e korrupsionit endemik në radhët e policisë.
