Ngjarja tragjike që ndodhi në shkollën 9-vjeçare “Fan Noli” në Tiranë, ku 14-vjeçari Martin Cani humbi jetën pas një konflikti me bashkëmoshatarin e tij Mario Përlleshi, ka tronditur opinionin publik dhe ka nxitur një valë protestash.
Më 18 nëntor, gjatë pushimit të gjatë, Martin Cani dhe Mario Përlleshi u konfliktuan, por situata u qetësua nga stafi i shkollës. Megjithatë, pas përfundimit të mësimit, rreth orës 13:00, ata u ritakuan në oborrin e shkollës, ku ndodhi përplasja fatale. Përleshja përfundoi me vdekjen e Martin Canit dhe plagosjen e shokut të tij, Luis Meçe. Sipas autoriteteve, sherri nisi për një konflikt trivial, ndërsa autori nuk ka shprehur pendesë për aktin e tij. Aktualisht, autori është transferuar në institucionin e vuajtjes së dënimit për të miturit në Kavajë.
Protestat për këtë ngjarje kanë qenë të shumta dhe pritet të vijojnë. Aktivistët kanë lajmëruar protestën e radhës më 3 dhjetor, ora 18:00, ku qytetarët do të mblidhen pranë shkollës “Fan Noli” dhe do të marshojnë drejt Ministrisë së Arsimit dhe Sportit.
Në dy protestat e mëparshme, prindërit dhe qytetarët kanë kërkuar dorëheqjen e ministres së Arsimit, Ogerta Manastirliu, si dhe masa të menjëhershme për të rritur sigurinë në shkolla. Kjo ngjarje ka hapur një debat të gjerë mbi sigurinë dhe përgjegjësinë institucionale në mjediset arsimore.
