Detaje të reja kanë dalë në dritë lidhur me vrasjen e rëndë të ndodhur një ditë më parë në Tiranë, ku një konflikt i çastit në trafik përfundoi me humbjen e një jete. Burime pranë hetimit bëjnë me dije se autori i dyshuar ndodhej në automjet së bashku me bashkëshorten e tij në momentin e ngjarjes, të cilën sapo e kishte marrë nga puna.
Sipas të njëjtave burime, gjatë lëvizjes në rrugë, ai është përballur me viktimën Egli Pashollarin, i cili po udhëtonte gjithashtu me makinë. Mes tyre ka nisur fillimisht një debat verbal për përparësinë e lëvizjes, një situatë e zakonshme në trafikun urban, por që këtë herë ka marrë një kthesë dramatike.
Pas shkëmbimit të fjalëve, të dy drejtuesit kanë ndaluar automjetet dhe kanë zbritur në rrugë, ku konflikti ka kaluar në përplasje fizike me grushte. Në kulmin e sherrit, autori dyshohet se ka nxjerrë një mjet prerës, duke e goditur viktimën në mënyrë fatale. Pavarësisht ndërhyrjes së shpejtë, plagët e marra rezultuan vdekjeprurëse.
Mësohet se autori ishte i martuar, baba i dy fëmijëve dhe banues në zonën e Kombinatit, ndërsa punonte si punonjës sigurie. Viktima, nga ana tjetër, kishte shërbyer si polic i burgjeve.
Ngjarja ka shkaktuar reagime të forta në opinionin publik dhe ka rikthyer vëmendjen te rreziku i konflikteve spontane në rrugë, të cilat, në pak minuta, mund të përfundojnë në pasoja të pakthyeshme. Hetimet vijojnë për të sqaruar plotësisht rrethanat dhe përgjegjësitë penale të ngjarjes.
