Prej vitesh është premtuar që në shkollat shqipe të Maqedonisë së Veriut të përfshihej abetarja e unifikuar për nxënësit. Mirëpo pavarësisht premtimeve asgjë nuk është realizuar ende, por duket se kësaj here plani është më i qartë se kurrë më parë.
Zv/ministri i Arsimit në Maqedoninë e Veriut, Arafat Shabani, dha një lajm të shumëpritur për nxënësit shqiptarë gjatë një aktiviteti për Ditën e Alfabetit të gjuhës shqipe. Ai deklaroi se duke nisur nga shtatori i vitit të ardhshëm në shkollat shqipe të Maqedonisë së Veriut do të ketë Abetare të unifikuar, e njëjta që përdoret edhe në Shqipëri e Kosovë.
“Kam kënaqësinë e veçantë të paralajmëroj shpresën dhe dëshirën e kahmotshme të nxënësve shqiptarë, Abetarja e unifikuar të bëhet realitet. Ajo shpresojmë të jetë në përdorim në të gjitha shkollat shqipe nga shtatori i ardhshëm”, u shpreh Shabani.
Për vite me radhë nxënësit kanë mësuar nga një abetare e përpiluar nga disa autorë nga Maqedonia e Veriut dhe sigurisht që gjithçka ndryshonte nga abetarja me të cilën mësonin fëmijët në Shqipëri. Abetarja e unifikuar u promovua para 8 viteve në Prizren, me rastin e 100-vjetorit të pavarësisë së Shqipërisë. Me këtë rast, ministritë e arsimit të të dyja vendeve theksuan se qëllimi i abetares është që t’i lidh fëmijët shqiptarë në rajon me një libër të bërë me frymën evropiane.
