Rektori i Universitetit të Tiranës, Artan Hoxha, gjatë një konference ku prezantoi edhe risitë për shkak të pandemisë Covid-19, që do të ndodhin në vitin ri akademik 2020-2021, është shprehur se do të ketë një alternim mes mësimit online dhe mësimit në auditore.
Gjatë fjalës së tij, rektori Hoxha deklaroi se të gjithë institucionet e UT po punojnë për unifikimin e platformave, duke bërë të mundur sipas tij alternimin e mësimit online me atë në auditore.
“Do të ketë një alternim mes mësimit në auditor dhe mësimit në distancë nëpërmjet platformave, që në dijenin time të gjithë institucionet po punojnë që të unifikojnë platformat. Përfshi dhe Universitetin e Tiranës.
Në të gjithë Universitetet po punohet për krijimin e një platforme që lejon zhvillimin normalisht të mësimit. Kanë akses më të lehtë si për pedagogët dhe për studentët. Po trajnohen në përdorimin e sistemit, pedagogët, administratorët, studentët”, ka thënë Hoxha.
Rektori i Universitetit të Tiranës ndër të tjera tha se tarifat nuk kanë ndryshuar për asnjë nga ciklet e studimit, përveç tarifës së regjistrimit.
“Sa i përket tarifarve, ato janë përcaktuar në Paktin për Universitetin. Është e njëjta që ka qenë, nuk ka ndryshuar asgjë. Për masterin, tarifën e regjistrimit e kemi bërë nga 25 mijë lekë të vjetra në 20 mijë lekë të vjetra. Duke si një shifër e ulët, por ne na kushton rreth 50 milion lek të vjetra.
Ka studentë që duan të përgjysmojnë tarifën (bëhet fjalë për tarifën e masterit).
Të përgjysmosh tarifën do të thotë të bllokosh universitetin. Unë si rektor e kam në objektivin tim por nuk mund ta them tani në këtë situatë”, është shprehur rektori iUniversitetit të Tiranës, Artan Hoxha.
Por nëse viti akademik i ri do të alternohet në dy formate, në atë online dhe në formatin klasik në auditore, atëherë përse studentët duhet të paguajnë të njëjtin çmim tarife?
Duke qenë se vetëm një pjesë e vitit akademik do të shfrytëzohet në auditore dhe pjesa tjetër në platformat online të cilat kanë edhe koston e tyre shtesë për pagesën e internetit në shtëpi, përse studentët duhet të paguajnë tarifën e plotë studimore.
Kujtojmë se tarifat e nivelit master në Universitetin e Tiranës janë nga më të lartat në rajon.
Sakaq rektori i sapozgjedhur i UT, Artan Hoxha, tenton që t’i shmanget përgjysmimit së tarifës vjetore në këtë periudhë pandemie, kërkesë kjo mëse e drejtë e studentëve, pasi fshihet pas argumentit se këto tarifa janë vendosur nga Pakti për Universitetin, platformë kjo e miratuar me Vendim të Këshillit të Ministrave në janar të vitit 2019-të, pas protestave të bujshme studentore në dhjetor të 2018-tës./IconStyle.al/
