Vijon skandali i gjuetisë së kafshëve të egra në Shqipër.
Disa ditë më parë “Independent” ka përhapur alarmin me një artikull kushtuar gjuetisë së kafshëve të egra në Shqipëri, pas publikimit të një fotoje të një restoranti në Drilon që ofron gatime me mish ariu.
Media vijon më tej dhe shkruan se blerësit janë kryesisht pronarë restorantesh dhe hotelesh, të cilët i mbajnë kafshët për të tërhequr turistë, ose individë që duan kafshë shtëpiake. Shqiponjat, simboli kombëtar i Shqipërisë, janë veçanërisht të njohura dhe shpesh gjenden të balcamosura si trofe në vendet publike.(Lexo këtu)
Ditën e sotme, Shoqata e Ruajtjes dhe Mbrojtjes së Mjedisit Natyror në Shqipëri ka publikuar disa foto nga brenda një restoranti në afërsi të Elbasanit, ku ndodhen të balsamosur tre kafshë të rrezikuara.
Përveç gëzofit të ariut dhe të dhelprave që janë varur me krenari në mur, pranë tyre janë lënë edhe tre rrëqebujt.
Rrëqebulli i Ballkanit është i listuar si një ndër gjallesat më të rrezikuara dhe mendohet se në Shqipëri kanë mbetur vetëm 10 të kësaj specieje, ndërsa në të gjithë Ballkanit vlerësohet të jetë jo më shumë se 50 të tillë.
Po ashtu, në menunë e restoranit mbizotërojnë sugjerimet për servirjen e pjatave me kafshë e shpendë të egra, përfshirë derra të egër, kaproj, mëllenja dhe shapka.
PPNEA i bën thirrje të gjithë institucioneve vendimmarrëse, politikbërëse dhe ligjzbatuese, që të reagojnë me urgjencë ndaj rastit në fjalë dhe të parandalojnë në vazhdimësi raste të ngjashme, të cilat përbëjnë krime mjedisore, si dhe një rrezik serioz ndaj llojeve që janë drejt zhdukjes në vendin tonë.
POSTIMI I PLOTË:
TRE RRËQEBUJ TË VRARË, TË BALSAMOSUR DHE TË EKSPOZUAR NË NJË RESTORANT NË AFËRSI TË ELBASANIT: BARBARIA EKSTREME NDAJ JETËS SË EGËR NË SHQIPËRI ARRIN KULMIN!
Një restorant i vetëm në hyrje të qytetit të Elbasanit ka në brendësi të tij 30% të popullatës të të gjithë llojit në Shqipëri! Fatkeqësisht jo të gjallë, por të vrarë, të masakruar dhe të ekspozuar për argëtim klientësh dhe “zbukurim” ambienti. Rasti më skandaloz i raportohet PPNEA-s nga qyteti i Elbasanit. Jo vetëm rrëqebuj, por edhe arinj, kaproj dhe lloje të tjera të mbrojtura ekspozohen në këtë restorant, i cili servir në mes të ditës edhe pjata me kafshë e shpendë të egra, përfshirë derra të egër, kaproj, mëllenja dhe shapka.
Rrëqebulli i Ballkanit është i listuar si i rrezikuar në mënyrë kritike (CR) në Listën e Kuqe të IUCN, dhe në Shqipëri mendohet se mbijetojnë jo më shumë se 10 individë, çka e bën një nga gjitarët më të rrezikuar për zhdukje në vend. Ndërkohë që popullata në të gjithë Ballkanin vlerësohet të jetë jo më shumë se 50 individë, kjo specie ende vazhdon të bjerë viktimë e brakonazhit nga individë që nuk tregojnë minimumin e konsideratës ndaj ligjit si dhe dhembshurinë minimale njerëzore ndaj një lloji që është në prag të zhdukjes.
PPNEA i bën thirrje të gjithë institucioneve vendimmarrëse, politikbërëse dhe ligjzbatuese, që të reagojnë me urgjencë ndaj rastit në fjalë dhe të parandalojnë në vazhdimësi raste të ngjashme, të cilat përbëjnë krime mjedisore, si dhe një rrezik serioz ndaj llojeve që janë drejt zhdukjes në vendin tonë.
