Është ndarë nga jeta në moshën 74-vjeçare Paqësor Hajdini, babai i personazhit të njohur të rrjeteve sociale, Genard Hajdini. Lajmi i hidhur është bërë publik më 10 tetor dhe ka sjellë dhimbje të madhe për familjarët, të afërmit dhe miqtë e tij.
Humbja e tij vjen vetëm dy muaj pas një ngjarjeje të rëndë që tronditi opinionin publik. Më 3 gusht 2025, në orët e para të mëngjesit, në një lokal në rrugën “Bardhyl” në Tiranë, Paqësor Hajdini dhe i biri, Genardi, u dhunuan fizikisht nga 40-vjeçari Sh.G. Pas sulmit, të dy përfunduan në Spitalin e Traumës ku morën ndihmë mjekësore. Në një video të publikuar më vonë nga spitali, Genard Hajdini tregoi gjendjen e rënduar pas dhunës duke thënë: “Na rrafi njëri, na bëri peshk fare.”
Ndërsa shkaqet e ndarjes nga jeta të Paqësor Hajdinit nuk janë bërë ende zyrtarisht të ditura, nuk përjashtohet mundësia që pasojat e ngjarjes së gushtit të kenë ndikuar në përkeqësimin e gjendjes së tij shëndetësore.
Paqësor Hajdini do të kujtohet nga familjarët si një njeri i qetë, i dashur dhe mbështetës i palodhur për djalin e tij, i cili shpesh e përfshinte në videot e tij në rrjetet sociale, duke e bërë një figurë të dashur edhe për publikun.
Ngushëllime familjes Hajdini për këtë humbje të madhe.
