Ende nuk dihet arsyeja por katër anëtarë të Aleancës për Mbrojtjen e Teatrit janë shoqëruar pasditen e sotme në komisariatin Nr.1 Tiranë. Sipas mediave dyshohet se ata se janë shoqëruar pasi një prej tyre tentoi të thyejë kordonin policor tek pedonalja e Tiranës afër Ministrisë së Brendshme.
Aktivistët e shoqëruar janë arkitekti Astrit Seranaj, pedagogu Ergys Mertiri, artisti Donald Martini dhe tekniku Gentjan Hasani. Fillimisht është shoqëruar Astrit Seranaj dhe më pas 3 të tjerët.
Së fundmi, aktivisti dhe pedagogu i Universitetit të Tiranës Ervin Goci shkruan se ndaj tyre është ushtruar dhunë.
Nëpërmjet një statusi në Facebook, Goci shkruan se nga dëshmitë e para ka mësuar se dy aktivistë janë goditur e dhunuar brenda në Komisariat.
Ai nuk jep detaje, por fton gazetarët të shkojnë në Komisariat, pasi shkruan se çdo ditë që kalon rendi publik po merr fund.
Ndërkohë, lajmin e shoqërimeve e ka konfirmuar me një status në Facebook edhe aktori Neritan Liçaj. Ai shkruan se Policia ka shoqëruar 4 anëtarët pa asnjë arsye.
“Policia diktatoriale…ka ndaluar antarët e Aleancës për mbrojtjen teatrit pa asnjë arsye…cuc gangsterri!Kam ndaluar Titi Seranaj arkitekt.Donald Martini artitlst dhe Ergys Mertiri.Turp me shume madh nuk bëhet!”- shkruan ai.
