Një ngjarje e rëndë ka tronditur qytetin e Peruxhias dhe komunitetin shqiptar në Itali. Hekuran Cumani, një 23-vjeçar me origjinë shqiptare që jetonte në Fabriano (Ancona), u vra me thikë në orët e para të së shtunës, në një parking i cili ishte pranë Universitetit të Peruxhias.
Sipas Prokurorisë, krimi dyshohet të ketë ndodhur pas një sherri që kishte ndodhur për arsye “të parëndësishme”. Viktima u godit me thikë në fyt dhe në gjoks, plagë që rezultuan fatale. Ekipet e urgjencës mbërritën shpejt, por i riu kishte ndërruar jetë në vend.
Hekurani ndodhej në Peruxhia për një mbrëmje me miqtë. Debati nisi jashtë lokalit “110 Caffè”, pranë departamentit të Matematikës. Konflikti verbal degjeneroi në përleshje fizike dhe më pas në vrasje. Autori, ende i paidentifikuar, është në kërkim nga policia, e cila po analizon pamjet e kamerave të sigurisë.
Miqtë e përshkruajnë Hekuranin si një djalë të qetë, të apasionuar pas palestrës dhe jetës së shëndetshme. “Ishte një mik i mirë, i dashur me familjen dhe kafshët,” tha një prej tyre.
Autoritetet lokale kanë shprehur ngushëllime, duke e cilësuar ngjarjen një humbje të madhe për të gjithë qytetin. “Peruxhia qëndron pranë atyre që po vuajnë sot,” thuhet në deklaratën e bashkisë.
