Modelja nga Shkodra, Klevisa Ymeri është dënuar me masën e paraburgimit një muaj për shkaktim të aksidentit me pasoja fatale në Kroaci, ku humbën jetën vëlla e motër.
Vetë e reja shqiptare ka pësuar lëndime të lehta dhe për këtë arsye është transferuar në repartin e kirurgjisë abdominale në Spitalin e Përgjithshëm të Dubrovnikut.
Pas aksidentit dhe daljes nga Spitali i Përgjithshëm i Dubrovnikut, shqiptarja është arrestuar dhe marrë në pyetje.
Aksidenti ka ndodhur të martën rreth orës 20:30 në rrugën D-8, në zonën e Ratacit afër Sllanos.
Ymeri ka qenë duke lëvizur me një fuoristradë BMW me targa sllovake e me shpejtësi gati 170 km/h kur është përplasur me makinën e të rinjve që kanë humbur jetën në vendngjarje.
Por kush është Klevisa Ymeri?
Klevisa u bë e njohur për publikun dy vjet më parë kur ajo vendosi të surprizonte një shok që ndodhej në burg në Trento të Italisë.
“Duam t’i tregonim se jemi pranë tij pavarësisht gjithçka. Ideja ishte e imja dhe e vëllait të tij. Ikëm sepse nuk e dinim nëse ishte e ligjshme. Është burg i sigurisë maksimale dhe zhurma të tilla mund të shkaktojnë probleme. Prandaj kemi shpëtuar”, shpjegoi ajo.
Për Klevisën nuk është hera e parë që përballet me ligjin. Në vitin 2017, kur ajo jetonte në Francë u arrestua së bashku me një person tjetër për trafik droge. Ai u dënua për shkeljen kurse Klevisa pasi u lirua, u dërgua në Shqipëri. Pas Francës, Klevisa u shpërngul në Itali.
Nuk dihet nëse do ja hedhë edhe këtë herë, pasi i vëllai i viktimave, Viktor Xherek kërkon drejtësi.
“Nuk duam që tragjedia e familjes sonë të jetë e kotë, kemi nevojë për ndihmën e publikut për të ndërgjegjësuar problemin, e njëjta gjë ndodh gjatë gjithë kohës në rrugët tona. Vëllai dhe motra ime nuk janë të vetmit që kanë vdekur, por le të jenë të fundit”, tha ai.
