Një ngjarje e rëndë ka tronditur aksin rrugor Elbasan-Librazhd, ku një aksident tragjik i mori jetën një fëmije 7-vjeçar. Pas ngjarjes, banorët e zonës kanë treguar momentet dramatike dhe kanë ngritur shqetësime serioze për sigurinë në këtë segment rrugor.
Sipas dëshmive të tyre, automjeti i përfshirë në aksident dyshohet se po lëvizte me shpejtësi të lartë në momentin e përplasjes. Banorët kanë kundërshtuar deklarimin e drejtuesit të mjetit, i cili mësohet të ketë thënë se po udhëtonte me rreth 10 kilometra në orë.
Menjëherë pas aksidentit, njerëzit që ndodheshin pranë zonës kanë ndërhyrë për të ndihmuar fëmijën, duke ngritur automjetin për ta nxjerrë nga poshtë tij. Sipas tyre, ambulanca është vonuar, ndërsa i mituri është transportuar drejt spitalit me një makinë të rastit.
“Shoferi thoshte që është në rrugë nacionale. ‘Kam të drejtën time. Kam qenë më 10 km në orë’, ka thënë shoferi. Në këtë rrugë ka ndodhur dhe një tjetër ngjarje e rëndë. Rruga është bërë shumë e rrezikshme në këtë lagje.“, u shpreh një banor i zonës.
Ndërsa një banore tha “E kanë parë që ishte me shpejtësi maksimale. Edhe pse ka thënë që ishte me 10 km/h. Erdhën gjitha burrat nga lokali, ngritën makinën që nxorën fëmijën. Thirrën ambulancën, nuk erdhi. E morën më makina te rastit dhe e çuan në spital. Ambulanca erdhi pas 15 minutash nga momenti që fëmija u nis në spital. Rruga është shumë e rrezikshme. Bëhen shumë aksidente”.
Banorët shprehen se rruga është kthyer në një pikë problematike, ku aksidentet janë të shpeshta dhe mungojnë masat e nevojshme për të garantuar sigurinë e banorëve dhe këmbësorëve.
