Një tragjedi e tmerrshme ka tronditur Rio de Janeiro, pas vdekjes së Barbara Elisa Yabeta Borges, një 28-vjeçare, e cila u godit nga një plumb “qorr” gjatë një shkëmbimi zjarri mes bandave rivale. Ngjarja ndodhi pak ditë pas një operacioni masiv të policisë në favelat e qytetit, ku humbën jetën të paktën 100 persona.
Barbara, punonjëse banke dhe blogere udhëtimesh, po udhëtonte në sediljen e pasme të një taksie pranë urës Fundao, kur banditët hapën zjarr. Shoferi i taksisë tregoi se e dëgjoi krismën e plumbave dhe e pa Barbarën të goditur në kokë. Ajo u transportua menjëherë në spital, por për fat të keq nuk mundi të mbijetonte. Policia gjeti dhe konfiskoi armë dhe municione nga vendngjarja.
Shoferi përshkroi momentet dramatike duke thënë se Barbara po përpiqej të merrte frymë dhe ai bënte gjithçka për ta shpëtuar. Shoqja e saj, Fernanda Vicencio, shprehu dhimbjen duke thënë se donte që të ishte një makth dhe të zgjoheshin nga ajo ngjarje tragjike.
Disa orë para vdekjes, Barbara kishte postuar një mesazh prekës në Instagram, duke i inkurajuar ndjekësit të “kujdeseshin për ata që i duan”. Ajo ishte e njohur për ndarjen e momenteve nga udhëtimet dhe aktivitetet e saj sportive, duke frymëzuar mijëra ndjekës. Hetimet për ngjarjen janë ende në vazhdim.
