Të presësh balluket nuk është një vendim i lehtë, pasi vetëm kur mendon torturën për t’i mbajtur në formën e duhur fillon një stres më vete.
Gjithsesi, nëse doni të eksperimentoni me pamjen, por nuk jeni gati të bëni ndryshime ku përfshihen gërshërët, ka një mënyrë gjeniale: Balluket e përkohshme!
Sugjerimi na vjen nga Enca Haxhia, e cila ka zgjedhur një pamje shumë klasike dhe ndryshe për këngën e saj më të re “Balad”, që pritet të publikohet sot.
Me flokët bjonde, por me bazë të errët, Enca shfaqet me modelin topuz, ndërsa bishti i flokëve qëndon si balluke.
Ky stil u kthye në trend në 2016-n dhe u quajt “Tinkerbell”, bazuar në personazhin e zanës prej të cilës u frymëzua modeli i flokëve.
Si ta bëni vetë në shtëpi?
Mjafton që të kapni flokët topuz, por në majën e kokës dhe pjesën e fundit të tyre t’i vendosni në pjesën e ballit. Mund t’ju ndihmojë një pjastër për të arritur pamjen që doni, ndërsa mund të zgjidhni formën e ballukeve të drejta apo ato anësore.
Ky është një nga modelet e flokëve që u bë i njohur kohë më parë nga Kendall Jenner, e cila nuk është e vetmja që i besoi për daljet publike.
Burimi: Iconstyle.al
