Një ngjarje e rëndë është regjistruar së fundmi në një prej azileve në Ali Dem, Tiranë. Një i moshuar u qëllua në gjumë me bastun, ndërsa infermieret këmbëngulin se u ishte krijuar ideja se i ndjeri ishte rrëzuar.
Për këtë, Gjykata e Tiranës ka lënë në arrest shtëpie të dyja infermieret pasi akuzohen se tentuan të fshihnin vrasjen e ndodhur në azilin e të moshuarve pak ditë më parë.
Ndërkohë, Gjykata dha vendim për masë mjekësore shtrim i përkohshëm në spitalin psikiatrik për autorin, Zyhdi Shehi.
Nazime Mulla dhe Glesantina Saraç, infermiere dhe kryeinfermiere në azilin ku u vra i moshuari, Virxhil Vesho, u arrestuan pasi e raportuan ngjarjen si aksidentale.
Sipas gazetares Anila Hoxha, nga këqyrja e kamerave të sigurisë, ka rezultuar se të dyja ato, pasi i moshuari mbeti i vdekur nga goditjet me shkopin e hekurit nga shoku i dhomës, Zyhdi Shehi, e kanë nxjerrë trupin dhe kanë pastruar gjakun, e më pas kanë njoftuar një agjenci funerale.
