Një 17-vjeçar ka përfunduar në spital pasi është plagosur me thikë gjatë një konflikti të ndodhur në një banesë në Tiranë, e cila dyshohet se përdorej për ushtrim prostitucioni. Ngjarja ka çuar në ndërhyrjen e menjëhershme të Policisë së Tiranës dhe arrestimin e dy personave, si dhe procedimin penal të një tjetri.
Sipas informacionit zyrtar, i mituri është futur në banesën ku ndodhej një 24-vjeçare, me të cilën më pas ka pasur një përplasje fizike. Gjatë konfliktit, 24-vjeçarja e ka goditur me mjet prerës, duke i shkaktuar plagë që kanë kërkuar transportimin e tij për ndihmë mjekësore në spital. Gjendja e të riut raportohet jashtë rrezikut për jetën.
Policia bën me dije se pas ngjarjes janë arrestuar 24-vjeçarja dhe 17-vjeçari, ndërsa është proceduar penalisht edhe një 30-vjeçar, i cili dyshohet se ka lidhje me aktivitetin në banesë. Hetimet paraprake tregojnë se i mituri dyshohet se ka tentuar të vjedhë me dhunë në ambientet e banesës, çka ka sjellë përshkallëzimin e konfliktit.
Në deklaratën zyrtare të policisë thuhet: “Specialistët kryen veprimet procedurale për arrestimin e shtetases S. Sh., 24 vjeçe dhe të një 17-vjeçari, si dhe referuan materialet në Prokurori, ku nisi procedimi penal për shtetasin M. B., 30 vjeç, pasi dyshohet se 24-vjeçarja ka dëmtuar me mjet prerës të miturin, i cili ka tentuar të vjedhë me dhunë në banesën ku shtetasja ushtronte prostitucion.”
Gjatë kontrollit të ushtruar në banesë, uniformat blu kanë sekuestruar edhe një sasi lënde narkotike të dyshuar kokainë, e cila dyshohet se përdorej nga 30-vjeçari. Hetimet vijojnë për zbardhjen e plotë të rrethanave të kësaj ngjarjeje.
