Së fundmi është arrestuar nga policia administratori i rrjetit farmaceutik “Farma Net Albania”, Sokol Topçiu.
57 vjeçari akuzohet se ka shitur mijëra ilaçe kontrabandë gjatë periudhës së pandemisë.
Ilaçet që u shitën në treg me çmim shumë herë më të lartë se sa u blenë janë: ‘inhixa, clexane, favira, alphagan, cyrotex, aricept, medro, co aprovel.’
Dyshohet se këto ilaçe u sollën në Shqipëri me 20 dollarë dhe disa prej tyre u shitën deri në 500 mijë lekë të vjetra. Të gjitha medikamentet që futeshin pa u regjistruar kryesisht përdoreshin për trajtimin e Covid-19.
“Iconstyle.al” ka akuzuar që një vit më parë veprimtarinë abuzuese të Topçiut.
Tenderi i maskave vitin e kaluar u hap me 12 mars dhe u mbyll më 17 mars, ndërsa fitues u shpall “Farma Net Albania”. Ky tender u realizua pa njoftim dhe OSHEE përdori 12.6 milion lekë nga paratë e taksapaguesve shqiptarë, për të blerë maska me valvul të llojit FPP1.
Pas një kërkimi në treg, rezultoi se një maskë e tillë në një farmaci në Tiranë, kushton 850 lekë.
Me një llogari të thjeshtë, rezultoi se OSHEE ka porositur mbi 14 mijë maska, numër ky shumë i madh në krahasim me numrin e punëtorëve.
Mirëpo “Farma Net Albania” ka vijuar të pasurohet edhe më tej, pasi ka fituar edhe dy tendera të tjerë për shumën e mbi 100 mijë eurove, sërish për pajisjen me maska të punonjësve të Postës Shqiptare dhe OSHEE.
Me këtë shifër Posta Shqiptare dhe OSHEE mund të sigurojnë rreth 15 mijë maska dhe natyrshëm lindi pyetja se për çfarë i duhen kaq shumë maska, kur numri i punëtorëve është disa fish më i ulët.
Edhe pse qeveria ka vendosur të pezullojë të gjitha tenderat përveç atyre që lidhen me COVID-19, “Farma Net Albania” e Sokol Topçiut dhe “Euromed”, kanë gjetur sërish shtigje për t’u pasuruar, duke përfituar mbi 3 milion euro tendera nga institucionet shqiptare për pajisjen me maska mbrojtëse dhe dezinfektantë.
Tenderat janë zhvilluar në periudha shumë të shkurtra kohore dhe pa garë, duke ngritur dyshime të forta për klientelizëm.
Në një kohë kur shqiptarët janë duke u përballur me kushte të vështira ekonomike për shkak të situatës së krijuar nga COVID-19, disa të tjerë vijojnë të pasurohen nga taksat e tyre.
/Iconstyle.al
