Shërbimi Meteorologjik Ushtarak ka publikuar parashikimin e motit për ditën e shtunë, 4 tetor 2025, duke sjellë lajme kryesisht të mira për pjesën më të madhe të vendit. Pas disa ditësh me reshje dhe temperaturë të ulët, kushtet atmosferike pritet të stabilizohen dhe të mbizotërojë moti i kthjellët, sidomos në zonat bregdetare dhe fushore.
Sipas të dhënave zyrtare, në veri të vendit temperaturat do të jenë më të ulëta. Shkodra do të ketë nga 8 deri në 17 gradë me diell, ndërsa Kukësi do të shënojë nga 3 në 10 gradë me alternime dielli dhe vranësirash. Në Bajram Curri termometri do të zbresë deri në 0 gradë në orët e para të mëngjesit, ndërsa maksimumi do të arrijë vetëm në 8 gradë. Edhe në Peshkopi parashikohet mot me diell dhe re me vlera nga 2 deri në 10 gradë.
Në qendrën e vendit dhe bregdet situata paraqitet më e butë. Durrësi dhe Tirana do të shënojnë nga 9 deri në 18 gradë me diell, Elbasani nga 7 në 17 gradë, ndërsa Vlora, Saranda dhe Gjirokastra do të kenë temperatura mes 6 dhe 18 gradë, kryesisht me mot të kthjellët.
Edhe Fieri parashikohet me mot të kthjellët dhe temperatura nga 7 deri në 18 gradë, tipike për fillimin e tetorit.Edhe jugu i thellë dhe zonat malore si Korça do të kenë diell me temperatura të freskëta, nga 3 deri në 13 gradë. Sinoptikanët parashikojnë kushte të favorshme për aktivitete në natyrë, megjithatë këshillojnë veshje më të ngrohta në orët e para të ditës dhe në zonat malore.
Ky stabilizim i motit shihet si një “pushim” i mirëpritur nga reshjet e fundit dhe parashikohet të vazhdojë edhe në ditët në vijim.
