Edmond Naska ka qëlluar tre herë me kallashnikov nga ballkoni i banesës, që ndodhet në kat të parë.
Ai ka kërcënuar se do të hapë zjarr sërish, ndërsa policia ka rrethuar zonën dhe po negocion për dorëzimin e tij.
Sipas njoftimit të policisë, Edmond Naska është me probleme të shëndetit mendor. Gjithashtu bëhet me dije se në vendngjarje priten të mbërrijnë forcat e RENEA-s që do të ndërhyjnë për neutralizimin e tij. Aktualisht nuk ka asnjë rrezik për jetën e banorëve.
NJOFTMI I POLICISË:
Korçë/Informacion paraprak
Sot, rreth orës 10:20, në lagjen nr. 16, dyshohet se shtetasi E. N., 71 vjeç, me probleme mendore, ka qëlluar me armë zjarri nga ballkoni i banesës së tij (në katin e parë të një pallati).
Shërbimet e Policisë vendore kanë ndërhyrë mënjëherë duke krijuar perimetrin e sigurisë dhe kanë evakuuar banorët e zonës.
Nga të shtënat nuk ka asnjë shtetas të lënduar.
Në drejtim të vendit të ngjarjes po shkojnë shërbimet e Repartit Special RENEA, për të ndërhyrë për neutralizimin e shtetasit E. N., i cili ka mbyllur derën e banesës.
Ndërkohë, shërbimet e Policisë, me masa sigurie për jetën e tyre, po mbajnë të rrethuar banesën.
Aktualisht nuk ka asnjë rrezik për jetën e banorëve.
