Lara Colturi ka arritur një rezultat historik për Shqipërinë, duke u renditur e dyta në Kupën e Botës në disiplinën e skive, një arritje që vendos vendin tonë në hartën e eliteve botërorë të këtij sporti.
Në Levi të Finlandës, 19-vjeçarja italiane që përfaqëson Shqipërinë, siguroi vendin e dytë në total, me kohën 1 minutë, 50 sekonda e 58 të qindtat, vetëm 1.66 më shumë se fituesja e kësaj gare, legjenda amerikane Mikaela Shiffrin.
Ky është podiumi i katërt në karrierë për skiatoren që përfaqëson Shqipërinë. Një ditë e rëndësishme për Larën, e cila sot feston ditëlindjen e 19-të.
Ky rezultat, që vjen pas disa muajsh pasigurie, është një shpërblim për përkushtimin dhe talentin e jashtëzakonshëm të Lara Colturi, e cila, vetëm pak muaj më parë, ishte pranë braktisjes së ekipit të Shqipërisë për shkak të kushteve të vështira që ofron shteti shqiptar për sportistët. Në prill, Lara dorëzoi një kërkesë për të braktisur përfaqësimin e Shqipërisë për shkak të mungesës së mbështetjes financiare dhe kushteve për stërvitje, duke u detyruar të mendojë seriozisht për rikthimin në Itali, vendin e saj të origjinës.
Pavarësisht kësaj, Colturi vendosi të qëndrojë dhe të garojë për Shqipërinë në Lojërat Olimpike Milano-Cortina 2026, një mundësi historike për vendin të garojë me katër skiatore, dhe një mundësi që do të ishte e pamundur pa përpjekjet dhe angazhimin e saj të jashtëzakonshëm.
Në një kohë kur edhe kampionë të tjerë të njohur shqiptarë, si Luiza Gega në atletikë, kanë denoncuar mungesën e kushteve për stërvitje dhe mbështetje, ky është një shembull tjetër i dhimbshëm i nevojës urgjente për investime reale në sport. Sportistët, që kanë sjellë medalje dhe kanë shënuar suksese të mëdha ndërkombëtarisht, meritojnë mbështetje të qëndrueshme dhe kushte të përshtatshme që do t’u mundësojnë të arrijnë më shumë.
