Çdo vit, më 19 nëntor, shënohet Dita Ndërkombëtare e Burrave, një ditë që synon të promovojë modelet pozitive mashkullore dhe të rrisë ndërgjegjësimin për sfidat me të cilat përballen burrat në shoqëri. Data lidhet me ditëlindjen e babait të Dr. Jerome Teelucksingh, mjek nga Trindadi dhe Tobago, i cili e ringjalli këtë festë në vitin 1999, duke e kthyer në një lëvizje globale.
Sipas The Independent, kjo ditë fokusohet në çështje kyçe që shpesh mbeten në hije, si shëndeti mendor, dhe parandalimi i vetëvrasjeve te burrat, të cilat përbëjnë një pjesë të rëndësishme të debatit publik.
Përmes aktiviteteve të ndryshme dhe nismave sensibilizuese, synohet të hapet dialog mbi presionet sociale dhe pritshmëritë që rëndojnë mbi burrat.
Dita Ndërkombëtare e Burrave është gjithashtu e lidhur me lëvizjen globale të burrave që zgjasin mjekrën dhe flokët gjatë muajit nëntor, për të nxitur biseda rreth kancerit të prostatës, kancerit të testikujve dhe rëndësisë së kontrolleve të rregullta shëndetësore. Kjo është pjesë e fushatës së njohur “Movember”, e cila ka krijuar një komunitet të madh ndërkombëtar të angazhuar në promovimin e shëndetit të burrave.
Dr. Teelucksingh e përshkruan Ditën Ndërkombëtare të Burrave si “një revolucion global të dashurisë”, që synon të sjellë vëmendje pozitive dhe mbështetje për burrat e të gjitha moshave.
Në një kohë kur sfidat emocionale dhe psikologjike shpesh minimizohen, kjo ditë shërben si kujtesë se kujdesi për shëndetin e burrave është po aq i rëndësishëm sa ai për gratë dhe komunitetin në tërësi.
