Emisioni investigativ Fiks Fare ka denoncuar dhunën e ushtruar ndaj nxënësve në shkollën fillore “Sotir Çapo”në Zharrëz, Patos.
Në videon e publikuar, mësuese Juliana Dine qëllon me shpullë dhe shkop fëmijët e klasës së dytë, të moshës 7 dhe 8- vjeçare. Madje i quan të miturit “zhulsa”, “të palarë”. Prindërit pretendojnë se krahas dhunës fizike, mësuesja ushtron edhe dhunë psikologjike. Prindërit u ankuan se, kohët e fundit, fëmijët kanë ndryshuar sjellje, nuk donin të shkonin në shkollë, nuk donin që të bënin detyrat dhe sjellje të tjera.
Në video, ajo pyet nxënësit nëse kanë bërë apo jo detyrat. Një prej tyre, thotë se i ka harruar. Mësuesja Juliana i kërkon që t’i afrohet. “Ç’a, gënjeshtre do më thuash, ëëë? Ja të marr pak V. dhe ça gënjeshtre do thuash. Më thuaj pse si ke bërë ti detyrat?”, i thotë mësuesja, dhe më pas, e qëllon me shpullë në kokë, shkruan Top Channel. Nxënësi, i tmerruar i përgjigjet se i ka harruar. Mësuesja i kërkon nxënësit të klasës së dytë që të shkojë t’i thërrasë nënës. Nëna dhe gjyshja i kërkojnë djalit se çfarë ka ndodhur, dhe ai i përgjigjet se e kishte rrahur mësuesja “më qëlloi me pëllëmbë”.
“Se ke kujdestari. Nëse më kërcënon, shkon direkt në burg” i drejtohet Juliana gjyshes.
Me një ton të acaruar i kthehet gjithashtu të ëmës së djalit, ku ndër të tjera shprehet:
“Mua nuk më bëhet vonë fare nëse mëson apo s’mëson fare, do troç ti”
Më tutje në video kërcënon një prej nxënësve se “ty do të të rrahë mësuesja”.
