Muzika e lartë në kundërshtim me aktin normativ që e ndalon pas orës 20:00 në të gjithë vendin, vijon të shqetësojë banorët në Malin Robit, me burim pikërisht resortin Prestige, aty ku ligji duket se nuk shkon dot përtej rojes së biznesit.
Pavarësisht raportimeve të njëpasnjëshme me pamje nga vendngjarja që ka publikuar iconstyle.al, deri më tani nuk është ndërmarrë asnjë masë për të ndaluar këtë biznes që shkel hapur ligjin.
Pak ditë më parë ne publikuam pamjet kur një patrullë policie me targë AA 425 VF, shkonte shumë pranë resortit rreth orës 2:00, i binte njëherë sirenës sa për paralajmërim dhe largohej ndërkohë që muzika vijonte pavarësisht ankesave të banorëve atje dhe orës së vonë. Nga burimet tona, raportohet se kanë qenë 3 efektivë në shërbim me këtë mjet policie, të cilët do të mbajnë përgjegjësi sapo të identifikohen.
Por me sa duket kjo neglizhencë nga ana e strukturave policore e ka burimin edhe diku tjetër. Mbrëmjen e djeshme, iconstyle.al ka komunikuar me disa efektivë të cilët ishin në krye të detyrës dhe lanë të kuptohej se urdhri për t’i lënë dorë të lirë biznesit në fjalë, paska ardhur nga lart.
Sipas komunikimit me patrullën e Rendit (në foto, targa AA 562 VF): “Askush nuk mund të shkojë te Prestige Resort, dhe nëse shkon, është e kotë”!
Edhe nesë patrulla shkon pranë resortit, maksimumi që mund të bëjë është të flasë me rojen e tij ose t’i bjerë sirenës.
Atëherë pyetjet që shtrojmë ne janë:
-Kush është ai person që paska ndërhyrë dhe ka dhënë urdhër që të mos shqetësohet biznesi?
-Cilat instanca apo struktura të policisë, bashkisë Kavajë apo Ministrisë së Brendshme janë përgjegjëse për këtë urdhër që i ndalon patrullat të bëjnë detyrën e tyre në respektim të ligjit?
Ne komunikuam edhe me zyrën e Postës së Policisë në Golem, prej së cilës varej edhe patrulla në fjalë, dhe sigurisht faji mbetet jetim. Madje operatori tha se sa herë që ka pasur ankesa, është dërguar patrulla në vendngjarje por muzika ka qenë e mbyllur. Por videot që disponojmë ne tregojnë se muzika dhe party me fishekzjarrë ka vijuar deri në orët e para të mëngjesit të së shtunës, të dielës dhe mbrëmjen e djeshme.
“Ne sa here kemi pasur raportime, kemi çuar shërbimet atje dhe ato kane raportuar se nuk ka pasur muzikë”.
I pyetur se përse policia thotë që “ka urdhër të mos të shkojë atje”, efektivi i Stacionit të Policisë në Golem tha:
“Nuk e di se çfarë thonë njerëzit, flas për ato që di vete. Nuk e di se kush e ka thënë atë dhe s’mbaj përgjegjësi unë për atë që kanë thënë. Unë di që sa herë ka shkuar patrulla ata e kanë pasur mbyllur. Unë jam sallë operative, nuk jam në terren. Shërbimet tona kanë raportuar se nuk ka pasur muzikë në momentin që ka shkuar patrulla”.
Për çështjen në fjalë, pas shumë tentativave dhe thirrjeve që nuk përgjigjeshin, “iconstyle.al” ka ngritur edhe një ankesë në SHÇBA, për të cilën do të kryhet hetimi administrativ përkatës, në përputhje me ligjin nr. 70/2014 “Për Shërbimin për Çështjet e Brendshme dhe Ankesat ne Ministrinë e Punëve te Brendshme” dhe aktet nënligjore për zbatim të këtij ligji.
Ne do të vijojmë ta ndjekim këtë çështje për t’i shkuar deri në fund!
Në një kohë që jemi në mes të sezonit turistik dhe në mes të pandemisë, është e trishtë kur e mendon se ankesat e tua nuk i dëgjon askush! Aq më tepër që shkeljet e këtij biznesi vijojnë të reklamohen në rrjetet sociale, si pa gjë të keq.
Iconstyle.al ka vënë në dijeni edhe Ministrin e Punëve të Brendshme, Sandër Lleshaj, i cili ka në dorë të bëjë kaq gjë për çështjet e rendit, sa i përket muzikës apo qarkullimit, në shërbim të qytetarëve.
I bëjmë thirrje publikisht të ndërmerren masa për aktin e papërgjegjshëm për të cilin, ashtu si shumica e gjërave në Shqipëri, nuk duhet që faji të mbetet jetim!
https://www.instagram.com/p/CESM-ggg7xW/
/Iconstyle.al
