“Michael Kors” ka blerë markën e mirënjohur “Versace” e themeluar nga Gianni Versace, për 2.1 miliardë dollarë, përfshi edhe borxhin, duke siguruar kështu rrugën drejt tregut ekskluziv luksoz evropian.
Kompania bëri me dije këtë të martë se “Michael Kors” do të ndryshojë emrin e markës në “Capri Holdings”, frymëzuar nga ishulli luksoz italian, sapo marrëveshja të përfundojë.
Ajo ka në plan të rrisë të ardhurat e “Versace”-s në 2 miliardë dollarë në nivel global dhe të rrisë gjurmët e shitjes me pakicë në 300 dyqane.
Kjo është hera e parë që një kompani amerikane prek nivele të tilla të larta të modës luksoze, të kontrolluara zakonisht nga LVMH (Moet Hennessy Louis Vuitton) që zotëron “Guerlain” dhe “Givenchy” dhe Kering, që zotëron markat “Balenciaga” dhe “Yves Saint Laurent”.
“Michael Kors” ishte bërë tashmë pjesë e modës evropiane që vitin e kaluar, duke blerë markën e këpucëve “Jimmy Choo”, për 1.2 miliardë dollarë.
Si pjesë e marrëveshjes, Donatella Versace, e cila ka ndihmuar në drejtimin e kompanisë që kur vëllai i saj Gianni u vra në vitin 1997, do të vazhdojë të mbikëqyrë markën.
Donatella, vëllai i saj Santo dhe vajza Allegra, do të qëndrojnë si aksionerë në kompani. Ekipi menaxhues i “Versace”-s do të vazhdojë të udhëhiqet nga drejtori, Jonathan Akeroyd.
