E dashur psikologe: Kam nevojë për këshillën tuaj: Si duhet të sillem në takimin e parë? E di që duhet të jem sa më e thjeshtë dhe natyrale, por do të doja ndonjë këshillë specifike sesi të dukem dhe të ndihem sa më mirë.
Psikologia: Pershendetje e dashur lexuese. Faleminderit qe me shkruajte. Sigurisht, për takimin e parë nuk ka rregulla të përcaktuara, por ju mund të mbani parasysh disa gjëra, për të cilat bien dakord shumë profesionistë që studiojnë sjelljen njerëzore. Së pari, ju duhet të jeni e çliruar nga ideja fikse sesi duhet të jetë djali “perfekt” ose “ideal”. Para se të shkoni në takim, përgatituni të shihni edhe gjëra që nuk ju pëlqejnë.
Së dyti, jepini mundësi vetes për ta njohur dikë, edhe nëse ai nuk përputhet me imazhin që ka familja juaj për atë që duhet të jetë partneri “i duhur” për ju. Mundohuni të gjeni një ekuilibër mes mendimeve të të tjerëve dhe intuitës suaj.
Së treti, tregohuni e hapur dhe pa paragjykime. Një afrim me mirësjellje, kujdes dhe kuriozitet për ta njohur tjetrin është më i mirë sesa arritja në përfundime të parakohshme.
Së katërti, respektoni progresin natyral të intimitetit: mos qëndroni shumë larg, por as mos u afroni menjëherë. Nëse i thua dikujt që e pëlqen që në fillim, kjo ia shton atij ankthin dhe e vë përballë një presioni që mund të shmanget. Zbulimi i ndjenjave dhe mendimeve tuaja, por edhe rrëfimi i së shkuarës suaj, duhet të fillojë ngadalë dhe të thellohet gradualisht.
Dhe së fundmi, rregulli bazë i takimit të parë: tregohuni një zonjushë e këndshme dhe e sjellshme, pa “e tepruar” duke e vënë veten tuaj në qendër të vëmendjes. Shpresoj t’ju kem ardhur në ndihmë!
*Shënim nga redaksia: Për çdo shqetësim apo pyetje që keni na shkruani në Facebook ose në nr. e telefonit: 067 602 7243
