Si të krijoni stilin tuaj të plazhit (FOTO)

Pjesa më e mirë e pushimeve tona verore, përveç pjesës që merremi me zgjedhjen e destinacioneve ekzotike dhe kohës për t’u relaksuar në diell, është padyshim ajo e MODËS që vjen me ne. Fillon përgatitja, paketimi i rrobave të stinës, veshjet, bikini, këpucët, çantat, peshqirët e plazhit… Ah! Sigurisht, momenti derisa të arrijmë atje, koha e gjatë që do kalojmë në diell, pasditet ku do dalim duke ndryshuar disa herë veshjet, por dhe fakti tjetër që jemi më shumë të zbuluara dhe komforte, nuk e vrasim mendjen për dimrin (Mos…. nuk doja t’jua sillja ndër mend, kemi kohë pas pushimeve).

Megjithatë ka disa kombinime që duhet t’i bëjmë gjatë pushimeve. Do e lodhim pak trurin dhe në verë. Ehh.. sepse është vendi i vetëm ku ne në fakt mund të veshim disa rroba dhe të dukemi perfekte dhe pse mund të humbim ndonjë shans për të qenë “fashion”. E drejtë apo jo?

Bikini (rroba banjo). Argëtohuni me të gjitha llojet duke zgjedhur ato me printet e dizenjot më kreative “mix and match”, por edhe të thjeshta fare ose vetëm me një ngjyrë. Krijoni stilin retro duke veshur rroba banjoje me shtrat të lartë dhe pse jo në ditët e fundit që mbaroni pjesën e të thekurit në diell, vishni një kostum trupor. Kështu do dukeni super fashion!!

Aksesorët, si kapelat; bejzbolli ose të zakonshme, janë një “Must” për pushimet verore. Një palë syze për ta mbrojtur edhe më shumë fytyrën tuaj të bukur, gjithashtu për ta bërë edhe më të dukshme freskinë që keni në plazh. Syzet e rrumbullakta, sy maceje, syze me pasqyrim siç i kemi parë pafund, vetëm zgjidhni ato që ju përshtaten më tepër.

Fustanet janë një domosdoshmëri për pushimet verore, në qytet apo dhe plazh, sidomos për darkën jashtë, pranë detit. Fustane maksi, të shkurtra, të bardha, të zeza, me dantella… Zgjidhini juve! Do dukeni shkëlqyeshëm. Këpucët, kur është fjala për arratisje të tilla të ëmbla, për mendimin tim, duhen të sheshta, ndoshta shapka, sandale gladiator, esparias dhe ndonjëherë ju sugjeroj atletet. Takat? Jo aq shumë edhe pse shpesh na gjenden dy palë brenda valixhes. Jam dakort; një palë klasike dhe një palë sandale të hapura, janë ok. Ju kuptoj, më mirë do ishit të sigurta, sesa të ndieheni keq.

Xhinse të shkurta. Seriozisht asnjëherë pushimet verore nuk mund të kalohen pa to. Të lirshme, super të shkurta ose në versionin të gjata, të ngushta lart. Ka shumë stile që mund të dalin në trend çdo sezon, por prap mbeten po ato xhinset e shkurta. Ja një truk që mund të bëni: merrni një palë pantallona që keni nga dimri i gjatë. Shkurtojini, kthejeni palën poshtë ose bëjeni me fije. Do dukeni super. Me xhinset e shkurtra kurseni kohën gjatë ditëve dhe netëve, për shkak se ato përshtaten mrekullisht me një bluzë fare të thjeshtë, deri te ajo këmisha për mbrëmje. Gjithashtu janë super komforte dhe për ditët që do eksploroni qytetin.

E gjitha me xhins. Mirë, ky është stili im i preferuar. Më pëlqen pamja; e gjitha me një veshje xhins në çdo kohë, veçanërisht kur jam me pushime. Nëse vishni xhinse të shkurta, pjesa lart duhet një këmishë xhinse ose bluzë xhinse, në total xhins; kjo është zgjedhja juaj, por unë jam duke ju thënë se do dukeni mahnitëse. Personalisht nuk e lë shpinën pa këmishën time xhinse dhe gjithmonë përfundoj duke “jetuar” në të. Gjëja më e rëndësishme për këtë periudhë është që të argëtoheni me stilin personal, duke mos marrë përsipër të eksperimentoni ndonjë budallallëk të modës. Kjo ka lidhje me të qenurit të lira të provoni për një kohë të gjatë duke e shijuar çdo moment.