Ndërkohë që jemi në prag të verës të gjithë po mendojmë se si ta çelim ngjyrën e flokëve. Mirëpo kur mendojmë se sa shumë i dëmtojmë flokët me bojërat dhe kimikatet e shumta që përdorim, stepemi para këtij hapi.
Ka një mënyrë për të çelur ngjyrën e flokëve pa shkuar te parukierja. Jo vetëm që do të kurseni paratë, por nuk do të dëmtoni as flokët me produkte kimike që janë shumë më të forta kur kërkojmë të arrijmë një ngjyrë të hapur.
Të çelësh flokët me kamomil është një nga metodat më të përhapura. Mjafton të vendosësh një bustinë në ujë të ngrohtë, ta lësh disa minuta dhe të përgatisësh më pas shampon me lëngun e përftuar.
Pas disa përdorimesh do të kesh flokë shumë më të çelët e të ndriçuar.
Një gjë të ngjashme mund të arrish edhe me pluhurin e kurkumës. Hidhni një lugë në ujë të nxehtë, përziejeni deri sa të keni një krem homogjen dhe lyeni flokët me të. Mbajeni gjysmë orë dhe shpëlajeni.
Nëse doni, provoni edhe limonin. Shtrydhni dy limona në një gotë ujë dhe lyeni flokët. Duhen sërish 30 minuta përpara se të shpëlani flokët dhe të vendosni balsamin.
