Ndeshja Shqipëri-Skoci përfundoi të shtunën mbrëma, e megjithatë shumë prej shtetasve skocezë që erdhën për të ndjekur ekipin e tyre kombëtar, qëndruan në fundjavë për t’u njohur edhe më shumë me kryeqytetin.
Madje aq shumë qëndruan saqë janë shqiptarizuar dhe tani po fotografohen duke urinuar në publik. Disa foto të bëra nga qytetarë shqiptarë, në mes të ditës, i janë dërguar portalit “JOQ”.
Në to shihen disa shtetas skocezë, lehtësisht të identifikueshëm për shkak të fundeve tipike me kuadrate, duke urinuar te lumi Lana ose në qendër të qytetit.
Bashkia e Tiranës e ka aplikuar shpesh gjobitjen e personave që kapen mat duke urinuar në publik. Por ndoshta ky ligj nuk është i njohur për skocezët, të cilët nuk dënohen për urinim në publik në vendin e tyre, gjithnjë nëse tregohen diskretë për të mos treguar më shumë seç duhet.
Askush nuk do të shqetësojë në Skoci nëse e lehtëson veten në mënyrë diskrete në fshat, por nëse urinon në murin e një pub-i ose në derën e dikujt nuk është një plan i shkëlqyer, sado i dehur të jesh.