Në Shqipëri do të strehohen të paktën 2 mijë afganë, bashkëpunëtorë të ushtrive të NATOS që po largohen prej andej bashkë me familjet e tyre, sipas burimeve për “Top Channel”.
Sipas burimeve, janë në kontroll e sipër për vende të lira hotelet në Durrës. Ndërsa në Tiranë po kontrollohet kapaciteti i konvikteve të universiteteve dhe shkollave të mesme. Një pjesë e madhe e afganëve do të qëndrojnë përkohësisht në godinat e qytetit studenti, ose në konviktet e tjera në kryeqytet.
Ndërkohë, në aeroportin e Kabulit avionët janë duke u mbushur me afganë që po largohen me shpejtësi pasi talebanët morën kontrollin e Afganistanit.
Shqipëria dhe Kosova iu përgjigjën thirrjes së Shteteve të Bashkuara të Amerikës për të ndihmuar afganët që rrezikojnë jetën në Afganistan.
Sekretari i shtetit, Blinken, tha sot se rrugët dhe aeroportet duhet të qëndrojnë të hapura për ata që po ikin nga Afganistani. Ministrja e Jashtme e Shqipërisë, Olta Xhacka bëri një koment pas deklaratës së Blinken duke thënë se Shqipëria është e gatshme të presë disa qindra persona, jeta e të cilëve kërcënohet.
“Ne qëndrojmë krah për krah me aleatët tanë, të gatshëm për të garantuar sigurinë dhe mirëqenien e tyre”, shkruan Xhacka.
Afganët do vendosen edhe në Kosovë dhe qeveria e Kosovës dhe presidentja Osmani dhanë menjëherë miratimin pas kërkesës amerikane.
