Për t’i lehtësuar sadopak nga ankthi dhe për t’ju mbushur disa orë me pozitivitet, Ansambli i Këngëve dhe Valleve Popullore ka perfromuar përpara spitalit “Shefqet Ndroqi” për të sëmurët me Covid-19 dhe mjekët. Ky koncert u organizua si simbol i shpresës për jetën dhe gjithë të prekurit e stafi mjekësor e kanë shijuar nga ballkonet e spitalit.
Disa kanë kërcyer e të tjerë kanë nxjerrë telefonat për të regjistruar këtë moment të veçantë, që ka qetësuar të prekurit nga koronavirusi, të cilët po kalojnë ditë të vështira. Koncerti i sotëm ishte surprizë për të infektuarit dhe mjekët e është mësuar se do të mbahet edhe ditën e nesërme.
Të prekurit nga Covid-19 rëndohen shumë psikologjikisht, ndaj është shumë e rëndësishme që në këto momente ta mbajnë moralin lart e të mendojnë pozitivisht. Për shkak të kësaj, ka pasur edhe raste që janë kthyer në tragjedi, ku 2 pacientë të prekur nga Covid-19 u hodhën nga spitali “Shefqet Ndroqi” pak kohë më parë.
Kujtojmë se gjatë kësaj kohe numrat e të prekurve me Covid-19 kanë shënuar një rritje alarmante javët e fundit në vendin tonë. Ditën e djeshme u raportua një shifër rekord viktimash, ku 19 pacientë humbën jetën për 24 orë nga Covid-19. Ndërkohë në 3 spitalet COVID, po trajtohen 455 pacientë, 21 në terapi intensive, 7 pacientë janë të intubuar.
