Kuota e 300 oersonave që duhet të kalojnë Kapshticën është përmbushur mëngjesin e sotëm, dhe emigrantët shqiptarë kanë mbetur të bllokuar në kufi.
Report Tv mëson se të gjithë ata që mbrëmë pritën në radhë, duke mos u kthyer mbrapsht apo shkuar në hotele, kanë kaluar për në Greqi mëngjesin e sotëm dhe ky fluks ka bërë që kuota e sotme të plotësohet shumë shpejt. Më ekzaktësisht rreth orës 07:40.
Policia ka konfirmuar se pala greke ka ndërprerë punën
“Policia e Kufirit ka konfirmuar lajmin se për sot, e dielë, kuotat e kalimit për në Greqi në pikën kufitare të Kapshticës janë mbushur. 300 qytetarë kanë kaluar kufirin deri në orën 07:30 dhe për këtë arsye ana e policisë greke është pezulluar puna e nuk do të lejohet kalimi i personave të tjerë për ditën e sotme. Aktualisht në pikën kufitare të Kapshticës ndodhen rreth 20 automjete dhe një autobus, që presin me shpresën e një negociate, për të kaluar edhe ata ditën e sotme”.
Problemi më i madh është se shumë personave u mbaron afati i tamponit i cili është vetëm 72 orë.
“Vij nga Tirana dhe sot më përfundon tamponi në orën 2. Ndërkohë nga aplikimi online kam marrë konfirmimin për të kaluar sot. Unë u dogja. Do qëndroj këtu me shpresën se mund të kaloj,”-shprehet një emigrant për Report tv.
Qytetarë të tjerë vijojnë të qëndrojë të bllokuar në këtë pikë të kalimit ndërsa janë formuar radhë të gjata automjetesh dhe grumbullime qytetarësh.
