Selena Gomez ka folur për herë të parë në mënyrë kaq të hapur për lidhjen e saj me të fejuarin, producentin e njohur muzikor Benny Blanco. Në një intervistë të fundit për revistën Allure, këngëtarja dhe aktorja 32-vjeçare zbuloi se “koha” ishte faktori kyç që bëri që marrëdhënia e tyre të funksiononte realisht.
“Po ta kishim provuar pesë vite më parë, nuk do të funksiononte. Nuk isha gati, nuk isha në vendin e duhur emocionalisht,” tha Gomez. “Kam mësuar shumë nga përvoja ime dhe kjo më ka ndihmuar të jem versioni më i mirë i vetes për Bennyn.”
Gomez shtoi se edhe Blanco e ndan të njëjtën ndjenjë dhe ndonjëherë shpreh keqardhje për vitet që kaluan pa qenë bashkë. “Ai thotë shpesh: ‘Zot, pse humbëm kaq shumë kohë?’ Por unë gjithmonë i përgjigjem: ‘Nuk do të të kisha pëlqyer atëherë. Isha e humbur.’”
Artistja gjithashtu foli me dashuri për ndikimin pozitiv që Blanco ka pasur në jetën e saj, duke e përshkruar si një nga njerëzit më të qëndrueshëm që ka njohur ndonjëherë. “Më bën të ndihem e sigurt dhe shumë normale,” tha ajo.
Në të njëjtën intervistë, Gomez rrëfeu edhe për ndjeshmërinë që ka ndaj komenteve për peshën e saj, duke theksuar se kritikat për trupin e kanë lënduar shpesh dhe e kanë bërë të ndihet e pasigurt.
Ky rrëfim shënon një moment reflektimi për këngëtaren, e cila duket më e sigurt dhe e lumtur se kurrë.
