Dizajnerja e brendshme franceze, Anne Deneuchatel, 53 vjeç, ka rrëfyer një histori të jashtëzakonshme mashtrimi që e ktheu jetën e saj përmbys por që në fund, sipas saj, i solli edhe një çlirim të madh personal.
Në librin e saj të ri “Je ne serai plus une proie” (Nuk do të jem më pre), ajo tregon se si ra në kurthin e një grupi mashtruesish nga Nigeria, të cilët pretendonin se ishin aktori hollivudian Brad Pitt. Gjatë 14 muajve komunikimi intensiv, ajo përjetoi një “romancë” virtuale të mbushur me mesazhe dashurie, premtime martesash dhe histori të sajuara për sëmundje terminale, të cilat çuan në transferimin e mbi 800,000 eurove.
Historia nisi me një mesazh në Instagram, gjoja nga nëna e Brad Pitt-it, e më pas u zhvendos në platformën Telegram. Anne rrëfen se ishte në një martesë të palumtur me një “milioner manipulativ” dhe se ndjesia e dashurisë virtuale e mbajti “gjallë”. Ajo financoi “dërgesa dhuratash”, shpenzime spitalore për “kancer të veshkave”, e deri te penalitete për vonesa xhirimesh.
🇫🇷 FLASH | Le reportage sur Anne, victime d’une escroquerie par un faux Brad Pitt, a été RETIRÉ des plateformes de TF1. Hospitalisée dans un établissement pour les dépressions graves, elle a été cyberharcelée. pic.twitter.com/8ui3ARePx1
— Cerfia (@CerfiaFR) January 14, 2025
Pasi kërkesat arritën një pikë ekstreme, rreth 15,000 euro për një fluturim privat, Anne e kuptoi mashtrimin dhe e raportoi në polici. Pas hetimeve, doli që prapa profilit të rremë fshiheshin tre burra nigerianë.
Megjithëse e lënduar emocionalisht dhe financiarisht, ajo e sheh këtë histori si një “rilindje”: divorci nga bashkëshorti, thotë ajo, ishte shpëtimi i saj i vërtetë.
