Vijojnë skandalet e Policisë së Shtetit dhe provat se kjo strukturë e kalbëzuar duhet rindërtuar. Së fundmi, një 29-vjeçar shqiptaro-amerikan është dhunuar nga efektivët pasi është konstatuar pa maskë.
Sipas asaj që raporton ORA News, bëhet fjalë për shtetasin Erald Alimehmeti fillimisht, i cili është ndaluar dhe më pas është shoqëruar dhunshëm nga punonjësit e policisë. Në dëshminë e dhënë, 29-vjeçari thotë se është rrahur brenda makinës gjatë shoqërimit ndërsa dhuna ka vijuar edhe në ambientet e komisariatit numër 2 brenda një dhomë pa kamera.
“Më futën në dhomë dhe nuk m’i hoqën prangat dhe aty më kanë goditur të gjithë policët që më shoqëruan. U kam thënë disa herë që të lajmëroja konsullatën amerikane që të njoftoja nënën time që është në Amerikë. Unë nuk kam goditur njeri pasi kam qenë i prangosur.”
Nga ana tjetër, efektivët e policisë Rrugore e mohojnë këtë deklaratë, duke u shprehur se Alimehmeti i ka kërcënuar dhe më pas gjuajtur me shkelma në momentin që ata i kanë hequr prangat.
Praninë e dhunës fizike te 29-vjeçari e ka konstatuar dhe gjyqtari Kreshnik Omari si dhe prokurori i çështjes, të cilët zhvilluan masën e sigurisë për shqiptaro-amerikanin Alihmehmeti, pasi rezultoi se ai kishte hematoma të shumta në fytyrë.
Pas këtij konstatimi prokuroria e Tiranës i ka kërkuar SHÇBA të nisë hetimet për punonjësit e policisë Albert Vidrica, Laert Bistri, Edvin Zhupa, Zabit Laçi dhe Shkëlqim Hasmica, të cilët dyshohet të jenë personat përgjegjës për dhunimin e Erald Alimehmetit.
