Robert Aliaj prej kohësh është rikthyer në ekranin shqiptar me një emision të moderuar nga vetë ai, që quhet “Vetëm një natë”, ku interviston persona nga rrethe të ndryshme të vendit të cilët nuk janë të famshëm.
Së fundmi, Roberti ka bërë një deklaratë mjaft të fortë gjatë një interviste për “Panorama plus” ku theksoi se nëpër ekrane “kemi të njëjtat shëmbëlltyra silikoni.”
Ndër të tjera ai ka folur edhe për politikanët duke pohuar se edhe pse dështimet janë normë, kemi të njëjtat fytyra në politikë: “Personazhet e panjohur në terrenin e tyre, të trajtuar me dinjitet, janë ajo çka i mungon realitetit shqiptar në të gjitha dimensionet. Kemi të njëjtat fytyra në politikë, edhe pse dështimet janë normë. Kemi të njëjtat shëmbëlltyra silikoni nëpër ekrane, kemi të njëjtat qëllime, etj.”
Ndërsa për personat të cilët nuk janë të famshëm ka deklaruar se janë të sinqertë dhe zemërbardhë.
“Njerëzit e panjohur janë më spontanë, më të sinqertë, më të mençur dhe më zemërbardhë me gjithë vështirësitë. Ata janë aktorët e vërtetë të dramës shqiptare. Nuk mund të them që më janë mërzitur fytyrat e bukura të ekraneve, sepse nuk i kam njohur asnjëherë fytyrat e tyre të vërteta”, tha Aliaj.